KHamoshiyon mein sada se likha hua ek nam

ḳhamoshiyoñ meñ sadā se likhā huā ik naam

suno hai dast-e-duā se likhā huā ik naam

har ik kī apnī zabāñ hai na paḌh sakegā bashar

zamīñ pe āb-o-havā se likhā huā ik naam

jo sun sako to suno ḳhushbuoñ ke lab par hai

guloñ pe bād-e-sabā se likhā huā ik naam

chamaktā rahtā hai jab tak kuredī jaa.e na raakh

chitā pe dast-e-fanā se likhā huā ik naam

ajiib baat hai paḌhiye to harf uḌne lageñ

badan badan pe qabā se likhā huā ik naam

kabhī kabhī to baraste hue bhī dekhā hai

falak pe kaalī ghaTā se likhā huā ik naam

magar ye quvvat-e-bīnā.ī kis tarah aa.ī

havā meñ dekhā havā se likhā huā ik naam

kabhī khuleñgī agar muTThiyāñ to dekheñge

hatheliyoñ pe hinā se likhā huā ik naam

ye kā.enāt to lagtā hai 'nūr' jaise ho

kisī kī ḳhaas adā se likhā huā ik naam

KHamoshiyon mein sada se likha hua ek nam

suno hai dast-e-dua se likha hua ek nam

har ek ki apni zaban hai na paDh sakega bashar

zamin pe aab-o-hawa se likha hua ek nam

jo sun sako to suno KHushbuon ke lab par hai

gulon pe baad-e-saba se likha hua ek nam

chamakta rahta hai jab tak kuredi jae na rakh

chita pe dast-e-fana se likha hua ek nam

ajib baat hai paDhiye to harf uDne lagen

badan badan pe qaba se likha hua ek nam

kabhi kabhi to baraste hue bhi dekha hai

falak pe kali ghaTa se likha hua ek nam

magar ye quwwat-e-binai kis tarah aai

hawa mein dekha hawa se likha hua ek nam

kabhi khulengi agar muTThiyan to dekhenge

hatheliyon pe hina se likha hua ek nam

ye kaenat to lagta hai 'nur' jaise ho

kisi ki KHas ada se likha hua ek nam