KHanda-e-gul mein bhi poshida fughan ho jaise

ḳhanda-e-gul meñ bhī poshīda fuġhāñ ho jaise

shāḳh-e-gul anjuman-e-nauha-garāñ ho jaise

aap ne kah dī vahī baat jo muñh par thī mire

aap ke muñh meñ bhī merī hī zabāñ ho jaise

aisā lagtā hai shahanshāh-e-jahāñgīr huuñ maiñ

malika-e-āliya tum nuur jahāñ ho jaise

kuchh ajab tarz kī is saal jalī hai holī

zinda lāshoñ kī chitāoñ kā dhuāñ ho jaise

vaqt ke dasht-e-masāfat kā hai mausam kaisā

sab kī āñkhoñ meñ bharā talḳh dhuāñ ho jaise

bujhtī sham.oñ kā bhī mātam nahīñ kartā koī

zindagī anjuman-e-zinda-dilāñ ho jaise

KHanda-e-gul mein bhi poshida fughan ho jaise

shaKH-e-gul anjuman-e-nauha-garan ho jaise

aap ne kah di wahi baat jo munh par thi mere

aap ke munh mein bhi meri hi zaban ho jaise

aisa lagta hai shahanshah-e-jahangir hun main

malika-e-aliya tum nur jahan ho jaise

kuchh ajab tarz ki is sal jali hai holi

zinda lashon ki chitaon ka dhuan ho jaise

waqt ke dasht-e-masafat ka hai mausam kaisa

sab ki aankhon mein bhara talKH dhuan ho jaise

bujhti shamon ka bhi matam nahin karta koi

zindagi anjuman-e-zinda-dilan ho jaise