khanDar mein dafn hui hain imaraten kya kya

khañDar meñ dafn huī haiñ imārateñ kyā kyā

likhī haiñ katba-e-dil par ibārateñ kyā kiyā

hisār-e-barf meñ rahnā kabhī sarāboñ meñ

safar ke shauq ne sauñpī sifārateñ kyā kyā

talāsh-e-lafz meñ umroñ kī kāvishoñ kā samar

añdhere ġhaar meñ ghūmīñ basārteñ kyā kyā

kahīñ badan ke haiñ saude kahīñ zamīroñ ke

huī haiñ shahr meñ ab ke tijārateñ kyā kyā

savere aañkh khulī to nazar meñ kuchh bhī na thā

ḳhayāl-o-ḳhvāb meñ pā.īñ bashārateñ kyā kyā

dayār-e-zar se matā-e-anā bachā laa.e

nazar nazar meñ bharī thiiñ hiqārateñ kyā kyā

tan-e-shikasta kī ta.amīr ke liye 'rāsiḳh'

amal meñ laa.ī ga.ī haiñ mahārateñ kyā kyā

khanDar mein dafn hui hain imaraten kya kya

likhi hain katba-e-dil par ibaraten kya kiya

hisar-e-barf mein rahna kabhi sarabon mein

safar ke shauq ne saunpi sifaraten kya kya

talash-e-lafz mein umron ki kawishon ka samar

andhere ghaar mein ghumin basarten kya kya

kahin badan ke hain saude kahin zamiron ke

hui hain shahr mein ab ke tijaraten kya kya

sawere aankh khuli to nazar mein kuchh bhi na tha

KHayal-o-KHwab mein pain bashaaraten kya kya

dayar-e-zar se mata-e-ana bacha lae

nazar nazar mein bhari thin hiqaraten kya kya

tan-e-shikasta ki tamir ke liye 'rasiKH'

amal mein lai gai hain mahaaraten kya kya