KHarab-haalon mein gham-KHwar baaten karte hain

ḳharāb-hāloñ meñ ġham-ḳhvār bāteñ karte haiñ

kyā vaqt hai ki mire yaar bāteñ karte haiñ

mire ḳhilāf jo kahnā hai mere muñh pe kaheñ

ye log kyoñ pas-e-dīvār bāteñ karte haiñ

zabāñ se baat nikalne kī der hotī hai

ravayye chīḳhte kirdār bāteñ karte haiñ

ye log jo bhī kaheñ un kī an-sunī karnā

hamāre baare meñ be-kār bāteñ karte haiñ

tamām apnoñ kā rakhtā huuñ maan maiñ lekin

mujhe ye Tokte har baar bāteñ karte haiñ

maiñ chīḳhtā huuñ mirī baat kyoñ nahīñ sunte

mujhe tumhāre taraf-dār bāteñ karte haiñ

udaas lafz varaq par bikher detā huuñ

to chupke chupke sab ash.ār bāteñ karte haiñ

vo chehra dekh ke dukh-dard bhuul jaatā huuñ

vo āñkheñ boltī ruḳhsār bāteñ karte haiñ

jahāñ hamāre sivā aur koī nahīñ hotā

ham un se soch ke is paar bāteñ karte haiñ

maiñ chāhtā huuñ vo har lamha mujh se bāteñ kareñ

magar vo 'shoḳh-jī' do-chār bāteñ karte haiñ

KHarab-haalon mein gham-KHwar baaten karte hain

kya waqt hai ki mere yar baaten karte hain

mere KHilaf jo kahna hai mere munh pe kahen

ye log kyon pas-e-diwar baaten karte hain

zaban se baat nikalne ki der hoti hai

rawayye chiKHte kirdar baaten karte hain

ye log jo bhi kahen un ki an-suni karna

hamare bare mein be-kar baaten karte hain

tamam apnon ka rakhta hun man main lekin

mujhe ye Tokte har bar baaten karte hain

main chiKHta hun meri baat kyon nahin sunte

mujhe tumhaare taraf-dar baaten karte hain

udas lafz waraq par bikher deta hun

to chupke chupke sab ashaar baaten karte hain

wo chehra dekh ke dukh-dard bhul jata hun

wo aankhen bolti ruKHsar baaten karte hain

jahan hamare siwa aur koi nahin hota

hum un se soch ke is par baaten karte hain

main chahta hun wo har lamha mujh se baaten karen

magar wo 'shoKH-ji' do-chaar baaten karte hain