KHaraba aur hota hai KHarab aahista aahista

ḳharāba aur hotā hai ḳharāb āhista āhista

dayār-e-dil pe aate haiñ azaab āhista āhista

savāl-e-vahshat-e-jāñ ke javāb āhista āhista

but-e-kāfir uThāte haiñ naqāb āhista āhista

koī dast-e-hinā.ī mū-qalam se bhartā jaatā hai

nigār-e-shām meñ rañg-e-sharāb āhista āhista

bagūla ibtidā-e-shauq meñ mahmil dikhā.ī de

nazar aate haiñ sahrā meñ sarāb āhista āhista

bahut bosīda yādoñ ke varaq jhaḌne bhī lagte haiñ

palaT umr-e-guzishta kī kitāb āhista āhista

surāġh-e-naqsh-e-pā miTte chale jaate haiñ sahrā meñ

ubhartā hai safar meñ iztirāb āhista āhista

kamāl-e-shauq-e-nazzāra meñ uryāñ hotā jaatā hai

sar-e-bām-e-falak vo māhtāb āhista āhista

kabhī ḳhushbū kabhī naġhma kabhī rañgīn pairāhan

'nadīm' ugtī hai yuuñ hī fasl-e-ḳhvāb āhista āhista

KHaraba aur hota hai KHarab aahista aahista

dayar-e-dil pe aate hain azab aahista aahista

sawal-e-wahshat-e-jaan ke jawab aahista aahista

but-e-kafir uThate hain naqab aahista aahista

koi dast-e-hinai mu-qalam se bharta jata hai

nigar-e-sham mein rang-e-sharab aahista aahista

bagula ibtida-e-shauq mein mahmil dikhai de

nazar aate hain sahra mein sarab aahista aahista

bahut bosida yaadon ke waraq jhaDne bhi lagte hain

palaT umr-e-guzishta ki kitab aahista aahista

suragh-e-naqsh-e-pa miTte chale jate hain sahra mein

ubharta hai safar mein iztirab aahista aahista

kamal-e-shauq-e-nazzara mein uryan hota jata hai

sar-e-baam-e-falak wo mahtab aahista aahista

kabhi KHushbu kabhi naghma kabhi rangin pairahan

'nadim' ugti hai yun hi fasl-e-KHwab aahista aahista