KHat bahut uske paDhe hain kabhi dekha nahin hai

ḳhat bahut us ke paḌhe haiñ kabhī dekhā nahīñ hai

kyā mire parda-nashīñ kā koī chehrā nahīñ hai

shahr itnā bhī na kar zulm ki zid par aa jā.ūñ

merā sahrā se ta.alluq abhī TuuTā nahīñ hai

kyā dikhātā hai mire naam pe ā.īna-e-shahr

muddatoñ se mirā apnā koī chehra nahīñ hai

jism kī pyaas ko hūroñ kī bashārat pe na Taal

ye hamārā dil-e-sāda koī bachcha nahīñ hai

kuchh nahīñ tishnagī-e-dīda-e-bīnā kā ilaaj

ḳhvāb tak meñ bhī koī sūrat-e-dariyā nahīñ hai

kab mujhe tujh se mohabbat hai urūs-e-duniyā

azdavājī sā ye rishta koī rishta nahīñ hai

'farhat-ehsās' nayā chāhiye us ko har raat

magar afsos ki us sā koī paidā nahīñ hai

KHat bahut us ke paDhe hain kabhi dekha nahin hai

kya mere parda-nashin ka koi chehra nahin hai

shahr itna bhi na kar zulm ki zid par aa jaun

mera sahra se talluq abhi TuTa nahin hai

kya dikhata hai mere nam pe aaina-e-shahr

muddaton se mera apna koi chehra nahin hai

jism ki pyas ko huron ki bashaarat pe na Tal

ye hamara dil-e-sada koi bachcha nahin hai

kuchh nahin tishnagi-e-dida-e-bina ka ilaj

KHwab tak mein bhi koi surat-e-dariya nahin hai

kab mujhe tujh se mohabbat hai urus-e-duniya

azdawaji sa ye rishta koi rishta nahin hai

'farhat-ehsas' naya chahiye us ko har raat

magar afsos ki us sa koi paida nahin hai