KHat-e-zist mein koi jast hai yahi raqs hai

ḳhat-e-zīst meñ koī jast hai yahī raqs hai

ye jahān sochoñ meñ mast hai yahī raqs hai

ye badan gulāb hai jabr kā kisī sabr kā

mirā azm gardish-e-hast hai yahī raqs hai

vo jo nok-e-ḳhār pe jam ga.e kahīñ tham ga.e

ye jo raḳht dil meñ alast hai yahī raqs hai

ye salāmtī kahīñ TuuT kar kahīñ phuuT kar

magar ab to fat.h-e-shikast hai yahī raqs hai

kisī jang meñ kisī rang meñ kisī sang meñ

ik ajiib sā dar-o-bast hai yahī raqs hai

baḌī chāshnī sī hai zahr meñ kisī lahr meñ

ye badan to zaḳhm-parast hai yahī raqs hai

maiñ rukā nahīñ kisī raah meñ na panāh meñ

mirī jang dast-ba-dast hai yahī raqs hai

maiñ vajūd-e-pul ke jamāl meñ kisī haal meñ

mirā naam chaudah august hai yahī raqs hai

KHat-e-zist mein koi jast hai yahi raqs hai

ye jahan sochon mein mast hai yahi raqs hai

ye badan gulab hai jabr ka kisi sabr ka

mera azm gardish-e-hast hai yahi raqs hai

wo jo nok-e-KHar pe jam gae kahin tham gae

ye jo raKHt dil mein alast hai yahi raqs hai

ye salamti kahin TuT kar kahin phuT kar

magar ab to fath-e-shikast hai yahi raqs hai

kisi jang mein kisi rang mein kisi sang mein

ek ajib sa dar-o-bast hai yahi raqs hai

baDi chashni si hai zahr mein kisi lahr mein

ye badan to zaKHm-parast hai yahi raqs hai

main ruka nahin kisi rah mein na panah mein

meri jang dast-ba-dast hai yahi raqs hai

main wajud-e-pul ke jamal mein kisi haal mein

mera nam chaudah august hai yahi raqs hai