KHat un ko bheja hai dil ke sujhaw par humne

ḳhat un ko bhejā hai dil ke sujhāv par ham ne

bharosa kar liyā kāġhaz kī naav par ham ne

ye dil kā zaḳhm to bharne meñ hī nahīñ aatā

rakhā hai pyaar kā marham bhī ghaav par ham ne

ye ek sach hai ki tum ko bhulā nahīñ paa.e

amal kiyā thā tumhāre sujhāv par ham ne

safīna Dūbnā lāzim thā apnī hastī kā

ki ḳhvāhishoñ ko bhī laadā thā naav par ham ne

faqat hayāt kī talḳhī nahīñ hai sheroñ meñ

likhā hai apne bhī zehnī tanāv par ham ne

qimār-ḳhāna-e-ālam se tajraba jo milā

lagā diyā hai vo hāsil bhī daav par ham ne

hayāt dab ga.ī ārā.ishoñ ke malbe meñ

gañvā dī umr isī rakh-rakhāv par ham ne

KHat un ko bheja hai dil ke sujhaw par hum ne

bharosa kar liya kaghaz ki naw par hum ne

ye dil ka zaKHm to bharne mein hi nahin aata

rakha hai pyar ka marham bhi ghaw par hum ne

ye ek sach hai ki tum ko bhula nahin pae

amal kiya tha tumhaare sujhaw par hum ne

safina Dubna lazim tha apni hasti ka

ki KHwahishon ko bhi lada tha naw par hum ne

faqat hayat ki talKHi nahin hai sheron mein

likha hai apne bhi zehni tanaw par hum ne

qimar-KHana-e-alam se tajraba jo mila

laga diya hai wo hasil bhi daw par hum ne

hayat dab gai aaraishon ke malbe mein

ganwa di umr isi rakh-rakhaw par hum ne