KHatm aaKHir ye silsila na hua

ḳhatm āḳhir ye silsila na huā

pesh kab koī hādisa na huā

dekhnā rū-e-yār kī tasvīr

dil-e-sad-pāra aa.ina na huā

maut kyā hai hayāt kyā shai hai

aaj tak hal ye mas.ala na huā

asl aur naql meñ hai farq baḌā

kabhī koī sanam ḳhudā na huā

shart-e-ulfat barahna-pā.ī hai

paañv meñ kis ke aabla na huā

bahr-e-hastī meñ umr chand nafas

paanī meñ koī bulbula na huā

jā chukī thī nigāh manzil tak

haif tai vo bhī fāsla na huā

dost ho yā aziiz hī koī

na huā koī bhī mirā na huā

baḳhshisheñ us kī aam haiñ 'māhir'

ham the kamzor hausla na huā

KHatm aaKHir ye silsila na hua

pesh kab koi hadisa na hua

dekhna ru-e-yar ki taswir

dil-e-sad-para aaina na hua

maut kya hai hayat kya shai hai

aaj tak hal ye masala na hua

asl aur naql mein hai farq baDa

kabhi koi sanam KHuda na hua

shart-e-ulfat barahna-pai hai

panw mein kis ke aabla na hua

bahr-e-hasti mein umr chand nafas

pani mein koi bulbula na hua

ja chuki thi nigah manzil tak

haif tai wo bhi fasla na hua

dost ho ya aziz hi koi

na hua koi bhi mera na hua

baKHshishen us ki aam hain 'mahir'

hum the kamzor hausla na hua