KHatm apni gardish-e-ayyam kar ke aae hain

ḳhatm apnī gardish-e-ayyām kar ke aa.e haiñ

sub.h ke nikle hue jo shaam kar ke aa.e haiñ

husn ko rusvā-e-ḳhās-o-'ām kar ke aa.e haiñ

'āshiqī ke naam ko badnām kar ke aa.e haiñ

kyā kaheñ duniyā meñ kyā kyā kaam kar ke aa.e haiñ

zindagī ko mūrid-e-ilzām kar ke aa.e haiñ

buuñd bhar bhī ham ne shīshoñ meñ nahīñ chhoḌī sharāb

mahfil-e-sāqī meñ ḳhālī jaam kar ke aa.e haiñ

manzil-e-jānāñ se aa.e lauT kar jo nā-murād

dafn apnī hasrat-e-nākām kar ke aa.e haiñ

intizār-e-hashr meñ ghabrā.eñge kyā ahl-e-hashr

apnī apnī qabr meñ ārām kar ke aa.e haiñ

aap kā saanī nazar aatā nahīñ koī 'zabīh'

aap har bazm-e-suḳhan meñ naam kar ke aa.e haiñ

KHatm apni gardish-e-ayyam kar ke aae hain

subh ke nikle hue jo sham kar ke aae hain

husn ko ruswa-e-KHas-o-'am kar ke aae hain

'ashiqi ke nam ko badnam kar ke aae hain

kya kahen duniya mein kya kya kaam kar ke aae hain

zindagi ko murid-e-ilzam kar ke aae hain

bund bhar bhi hum ne shishon mein nahin chhoDi sharab

mahfil-e-saqi mein KHali jam kar ke aae hain

manzil-e-jaanan se aae lauT kar jo na-murad

dafn apni hasrat-e-nakaam kar ke aae hain

intizar-e-hashr mein ghabraenge kya ahl-e-hashr

apni apni qabr mein aaram kar ke aae hain

aap ka sani nazar aata nahin koi 'zabih'

aap har bazm-e-suKHan mein nam kar ke aae hain