KHatm hoti hai kahan gardish-e-ayyam abhi

ḳhatm hotī hai kahāñ gardish-e-ayyām abhī

zulm sahnā haiñ bahut se dil-e-nākām abhī

nā-mukammal hai mohabbat meñ har ik kaam abhī

DhūñDhtā hai dil-e-mahjūr tū anjām abhī

bul-havas ishq sarāsar hai tirā ḳhaam abhī

dil meñ baaqī hai tire ḳhvāhish-e-ārām abhī

ham-safīrān-e-chaman rahnā ḳhabar-dār zarā

aaya gulshan meñ hai sayyād liye daam abhī

khul ga.ī aañkh mirī ḳhvāb se kyā zulm huā

merī āġhosh meñ thā koī dil-ārām abhī

ek do jaam se serī nahīñ hotī saaqī

chāhte piinā haiñ jī-bhar ke mai-āshām abhī

ye sazā us kī hai bad-ḳhū se mohabbat kyoñ kī

jhiḌkiyāñ kaisī vo deñge mujhe dushnām abhī

mujh ko rahte hue ka.abe meñ zamāna guzrā

dil meñ baaqī hai mire ulfat-e-asnām abhī

dekhiye hotī hai tai ishq kī manzil kaise

saḳht dushvār hai is raah meñ har gaam abhī

jurm aisā hī kiyā hai ki mohabbat kī hai

dekhiye lagte haiñ kyā kyā na.e ilzām abhī

kaun sā zikr thā kyā baat thī maiñ bhī to sunūñ

kis ġharaz se liyā jaatā thā mirā naam abhī

de diyā dil unheñ ab aage jo taqdīr dikhā.e

kaun jhagḌe meñ paḌe soch ke anjām abhī

uTh paḌā raat se kambaḳht sitam Dhāne ko

ai mo.azzin hai azaañ kā kahāñ hangām abhī

ab to din ḳhatm huā hai dil-e-betāb sañbhal

vaqt aane kā hai ye kaun sar-e-shām abhī

itnī himmat to ho koī ho pilāne vaalā

vo balā-nosh huuñ pī jā.ūñ maiñ sau jaam abhī

vo bhī din duur nahīñ haiñ jo salāmat aġhyār

gāliyāñ deñge vo le le ke mirā naam abhī

chāhte vo haiñ ki iz.hār ta'alluq kā na ho

ḳhat bhī aaya hai kabhī un kā to gumnām abhī

der se piite haiñ aġhyār barābar saaqī

sāmne mere nahīñ aaya hai ik jaam abhī

ik nazar paḌte hī jaate rahe sab hosh-o-havās

jalva-afroz thā ye kaun lab-e-bām abhī

chain se but mujhe ka.abe meñ na rahne deñge

dair se roz chale aate haiñ paiġhām abhī

kārgar vasl kī tadbīr na hogī koī

phir bhī karnā hai mujhe koshish-e-nākām abhī

dekhiye jhuktā hai dil dair-o-haram meñ kis jā

hai mire pesh-e-nazar kufr abhī islām abhī

lā sake taab na the tuur pe jis kī muusā

jalva dekhā hai vahī maiñ ne lab-e-bām abhī

dil-e-gum-gashta kā kuchh zikr na karnā hamdam

hasratoñ meñ mirī paḌ jā.egā kohrām abhī

hashr ke shor se jī-bhar ke na sone paa.e

mil chalā thā hameñ turbat meñ kuchh ārām abhī

jald se jald ilāhī shab-e-va.ada aa.e

chāhtā dil hai ye din hī se ki ho shaam abhī

kuchh bhī 'ishrat' nahīñ anjām-e-mohabbat kī ḳhabar

kaTte haiñ āh-o-fuġhāñ meñ sahar-o-shām abhī

KHatm hoti hai kahan gardish-e-ayyam abhi

zulm sahna hain bahut se dil-e-nakaam abhi

na-mukammal hai mohabbat mein har ek kaam abhi

DhunDhta hai dil-e-mahjur tu anjam abhi

bul-hawas ishq sarasar hai tera KHam abhi

dil mein baqi hai tere KHwahish-e-aram abhi

ham-safiran-e-chaman rahna KHabar-dar zara

aaya gulshan mein hai sayyaad liye dam abhi

khul gai aankh meri KHwab se kya zulm hua

meri aaghosh mein tha koi dil-aram abhi

ek do jam se seri nahin hoti saqi

chahte pina hain ji-bhar ke mai-asham abhi

ye saza us ki hai bad-KHu se mohabbat kyon ki

jhiDkiyan kaisi wo denge mujhe dushnam abhi

mujh ko rahte hue kabe mein zamana guzra

dil mein baqi hai mere ulfat-e-asnam abhi

dekhiye hoti hai tai ishq ki manzil kaise

saKHt dushwar hai is rah mein har gam abhi

jurm aisa hi kiya hai ki mohabbat ki hai

dekhiye lagte hain kya kya nae ilzam abhi

kaun sa zikr tha kya baat thi main bhi to sunun

kis gharaz se liya jata tha mera nam abhi

de diya dil unhen ab aage jo taqdir dikhae

kaun jhagDe mein paDe soch ke anjam abhi

uTh paDa raat se kambaKHt sitam Dhane ko

ai moazzin hai azan ka kahan hangam abhi

ab to din KHatm hua hai dil-e-betab sanbhal

waqt aane ka hai ye kaun sar-e-sham abhi

itni himmat to ho koi ho pilane wala

wo bala-nosh hun pi jaun main sau jam abhi

wo bhi din dur nahin hain jo salamat aghyar

galiyan denge wo le le ke mera nam abhi

chahte wo hain ki izhaar ta'alluq ka na ho

KHat bhi aaya hai kabhi un ka to gumnam abhi

der se pite hain aghyar barabar saqi

samne mere nahin aaya hai ek jam abhi

ek nazar paDte hi jate rahe sab hosh-o-hawas

jalwa-afroz tha ye kaun lab-e-baam abhi

chain se but mujhe kabe mein na rahne denge

dair se roz chale aate hain paigham abhi

kargar wasl ki tadbir na hogi koi

phir bhi karna hai mujhe koshish-e-nakaam abhi

dekhiye jhukta hai dil dair-o-haram mein kis ja

hai mere pesh-e-nazar kufr abhi islam abhi

la sake tab na the tur pe jis ki musa

jalwa dekha hai wahi main ne lab-e-baam abhi

dil-e-gum-gashta ka kuchh zikr na karna hamdam

hasraton mein meri paD jaega kohram abhi

hashr ke shor se ji-bhar ke na sone pae

mil chala tha hamein turbat mein kuchh aaram abhi

jald se jald ilahi shab-e-wada aae

chahta dil hai ye din hi se ki ho sham abhi

kuchh bhi 'ishrat' nahin anjam-e-mohabbat ki KHabar

kaTte hain aah-o-fughan mein sahar-o-sham abhi