KHatm kar dete hain lije aaj afsane ko hum

ḳhatm kar dete haiñ liije aaj afsāne ko ham

sham.a ke pahlū meñ dafnāte haiñ parvāne ko ham

ye nahīñ hai dekh kar aa.e haiñ dozaḳh yā bahisht

bandagī karte haiñ apne dil ke bahlāne ko ham

pattharoñ meñ jaan Dāleñge saroñ ko phoḌ kar

azm ye kar ke chale haiñ aaj but-ḳhāne ko ham

shab huī to us shajar hī ko alaav kar liyā

saa.e meñ baiThe the jis ke din meñ sustāne ko ham

bahs ke daurān ḳhud ham muttafiq us se hue

zo.am meñ apne ga.e the us ke samjhāne ko ham

dhuul uḌtī chhoḌ kar chal degā aage kārvāñ

aur rah jā.eñge 'āsim' Thokareñ khāne ko ham

KHatm kar dete hain lije aaj afsane ko hum

shama ke pahlu mein dafnate hain parwane ko hum

ye nahin hai dekh kar aae hain dozaKH ya bahisht

bandagi karte hain apne dil ke bahlane ko hum

pattharon mein jaan Dalenge saron ko phoD kar

azm ye kar ke chale hain aaj but-KHane ko hum

shab hui to us shajar hi ko alaw kar liya

sae mein baiThe the jis ke din mein sustane ko hum

bahs ke dauran KHud hum muttafiq us se hue

zoam mein apne gae the us ke samjhane ko hum

dhul uDti chhoD kar chal dega aage karwan

aur rah jaenge 'asim' Thokaren khane ko hum