KHatm ye fitrat-e-adam nahin hone wali

ḳhatm ye fitrat-e-ādam nahīñ hone vaalī

'ishq kī bhuuk kabhī kam nahīñ hone vaalī

maiñ kisī aur ke sāñche meñ Dhalā jaatā huuñ

zindagī to mirī mahram nahīñ hone vaalī

laakh aaḌe bhī agar aa.eñ muḳhālif bādal

chāñd kī raushnī maddham nahīñ hone vaalī

jaan hāzir hai hama-vaqt tumhārī ḳhātir

pesh-e-ġhairullah jabīñ ḳham nahīñ hone vaalī

chārāgar tū bhī namak Daal mire zaḳhmoñ par

chārasāzī mirā marham nahīñ hone vaalī

us pe tum sūra-e-yūsuf ko agar dam kar do

phir zuleḳhā kabhī barham nahīñ hone vaalī

munsalik ho to gayā huuñ maiñ tirī chaukhaT se

naukrī saḳht hai paiham nahīñ hone vaalī

dil vo shīshe kī 'imārat hai mirī jaan agar

TuuT jaa.e to munazzam nahīñ hone vaalī

zindagī āḳhirī ayyām ko aa pahuñchī hai

ab shab-e-ġham bhī shab-e-ġham nahīñ hone vaalī

ek hī shai kā talabgār rahā huuñ mehvar

'umr-bhar vo bhī farāham nahīñ hone vaalī

KHatm ye fitrat-e-adam nahin hone wali

'ishq ki bhuk kabhi kam nahin hone wali

main kisi aur ke sanche mein Dhala jata hun

zindagi to meri mahram nahin hone wali

lakh aaDe bhi agar aaen muKHalif baadal

chand ki raushni maddham nahin hone wali

jaan hazir hai hama-waqt tumhaari KHatir

pesh-e-ghairullah jabin KHam nahin hone wali

chaaragar tu bhi namak Dal mere zaKHmon par

chaarasazi mera marham nahin hone wali

us pe tum sura-e-yusuf ko agar dam kar do

phir zuleKHa kabhi barham nahin hone wali

munsalik ho to gaya hun main teri chaukhaT se

naukri saKHt hai paiham nahin hone wali

dil wo shishe ki 'imarat hai meri jaan agar

TuT jae to munazzam nahin hone wali

zindagi aaKHiri ayyam ko aa pahunchi hai

ab shab-e-gham bhi shab-e-gham nahin hone wali

ek hi shai ka talabgar raha hun mehwar

'umr-bhar wo bhi faraham nahin hone wali