KHauf-e-zulmat se larazti hai faza ab ke baras

ḳhauf-e-zulmat se laraztī hai fazā ab ke baras

zahr meñ Duub ga.ī bād-e-sabā ab ke baras

chain saḌkoñ pe mayassar na sukūñ hai ghar meñ

is tarah phailī hai dahshat kī vabā ab ke baras

dil kī āñkhoñ ne haqā.eq se churā liiñ nazreñ

oḌh lī fikr ne barfīlī ridā ab ke baras

paañv meñ Daal dī zanjīr havā-e-shab ne

phir bhī āzād hai mausam kī anā ab ke baras

maiñ bhī guzrā huuñ junūñ-ḳhez marāhil se magar

phaaḌ kar pheñk dī vahshat kī qabā ab ke baras

kaise aa.egā yahāñ koī parinda 'nashtar'

karb-angez hai maujoñ kī sadā ab ke baras

KHauf-e-zulmat se larazti hai faza ab ke baras

zahr mein Dub gai baad-e-saba ab ke baras

chain saDkon pe mayassar na sukun hai ghar mein

is tarah phaili hai dahshat ki waba ab ke baras

dil ki aankhon ne haqaeq se chura lin nazren

oDh li fikr ne barfili rida ab ke baras

panw mein Dal di zanjir hawa-e-shab ne

phir bhi aazad hai mausam ki ana ab ke baras

main bhi guzra hun junun-KHez marahil se magar

phaD kar phenk di wahshat ki qaba ab ke baras

kaise aaega yahan koi parinda 'nashtar'

karb-angez hai maujon ki sada ab ke baras