KHauf ke zahrile phan hain hausle ke aas-pas

ḳhauf ke zahrīle phan haiñ hausle ke ās-pās

yā'nī nuqsānāt bhī haiñ fā.ede ke ās-pās

yuuñ añdhere kī salāḳhoñ se huā āzād diip

chand jugnū rakh diye ham ne diye ke ās-pās

mar ke bhī hamsā.egī baaqī rahe so ik daraḳht

tum lagā denā hamāre maqbare ke ās-pās

kyā zamāna hai diloñ ko toḌ kar bhī aadmī

muskurātā phir rahā hai aa.ine ke ās-pās

ik ġhazal kī yak-ba-yak taqdīr raushan ho ga.ī

ik ġhazal rotī rahī banjar gale ke ās-pās

maiñ ne un kī sirf ik tasvīr khīñchī thī ki bas

titliyāñ hī titliyāñ thiiñ camere ke ās-pās

ek shab ik raushnī ne ḳhvāb meñ aa kar kahā

bā-vazū baiThā karo rote hue ke ās-pās

KHauf ke zahrile phan hain hausle ke aas-pas

ya'ni nuqsanat bhi hain faede ke aas-pas

yun andhere ki salaKHon se hua aazad dip

chand jugnu rakh diye hum ne diye ke aas-pas

mar ke bhi hamsaegi baqi rahe so ek daraKHt

tum laga dena hamare maqbare ke aas-pas

kya zamana hai dilon ko toD kar bhi aadmi

muskuraata phir raha hai aaine ke aas-pas

ek ghazal ki yak-ba-yak taqdir raushan ho gai

ek ghazal roti rahi banjar gale ke aas-pas

main ne un ki sirf ek taswir khinchi thi ki bas

titliyan hi titliyan thin camere ke aas-pas

ek shab ek raushni ne KHwab mein aa kar kaha

ba-wazu baiTha karo rote hue ke aas-pas