KHauf-zada the kaun se log in sher-dileron se

ḳhauf-zada the kaun se log in sher-dileroñ se

koī to itnā pūchhe in miTTī ke Dheroñ se

din ke des se uḌ aate haiñ merī āñkhoñ meñ

saath nibhānā bhuul ga.e the rañg añdheroñ se

tiir chalāne vaale ghar kyā lauT bhī pā.eñge?

kyā ye panchhī dam de deñge duur baseroñ se

shaam kā tārā, sub.h kā pahlā taarā Thahregā

hajla-e-vasl meñ raat rahegī, baat saveroñ se

koī apne ghar kā rasta bhuul sakā hai kabhī?

kyā jaane kyuuñ uḌ uḌ jaa.eñ kaag muñDeroñ se

ḳhaak uḌe to mere hāthoñ merī ḳhaak uḌe

mujh ko Dar lagtā hai, sāñpoñ aur saperoñ se

mujh ko jānñe vaale 'ḳhālid' jaan na pā.eñge

is chakkar meñ niklā huuñ maiñ, kitne pheroñ se

KHauf-zada the kaun se log in sher-dileron se

koi to itna puchhe in miTTi ke Dheron se

din ke des se uD aate hain meri aankhon mein

sath nibhana bhul gae the rang andheron se

tir chalane wale ghar kya lauT bhi paenge?

kya ye panchhi dam de denge dur baseron se

sham ka tara, subh ka pahla tara Thahrega

hajla-e-wasl mein raat rahegi, baat saweron se

koi apne ghar ka rasta bhul saka hai kabhi?

kya jaane kyun uD uD jaen kag munDeron se

KHak uDe to mere hathon meri KHak uDe

mujh ko Dar lagta hai, sanpon aur saperon se

mujh ko jaanne wale 'KHalid' jaan na paenge

is chakkar mein nikla hun main, kitne pheron se