KHayal aur fikr ko bulandi nazar ko baalidgi milegi

ḳhayāl aur fikr ko bulandī nazar ko bālīdgī milegī

qadam tū duniyā-e-ishq meñ rakh tujhe na.ī zindagī milegī

junūñ ko apne ḳhirad banā kar jo zindagī ko sañvār legā

yahāñ usī sāhib-e-junūñ ko ḳhirad kī paiġhambarī milegī

ye chaar din kī masarratoñ kā fareb bhī kitnā der-pā hai

umiid hai lamha lamha dil ko halāvat-e-zindagī milegī

kise gumāñ thā ki daur aisā bhī ham pe guzregā zindagī meñ

na ishrat-e-ḳhvājgī milegī na lazzat-e-bandagī milegī

rahe haiñ muddat se ham-safar ham hai phir bhī begānagī kā aalam

kise ḳhabar thī ki har tamanna ba-sūrat-e-ajnabī milegī

jadīd tahzīb kī ravish par javāñ rahe gāmzan tū ik din

havas ke halqe meñ nīm-uryāñ bahīmiyat nāchtī milegī

badalte hālāt kī numā.ish hameñ ye paiġhām de rahī hai

inhī añdheroñ se bazm-e-gītī ko ek din raushnī milegī

ye duniyā 'naġhmī' hai aatī jaatī nahīñ hai ye umr-e-jāvedānī

sajegī jab bhī tumhārī mahfil hamārī us meñ kamī milegī

KHayal aur fikr ko bulandi nazar ko baalidgi milegi

qadam tu duniya-e-ishq mein rakh tujhe nai zindagi milegi

junun ko apne KHirad bana kar jo zindagi ko sanwar lega

yahan usi sahib-e-junun ko KHirad ki paighambari milegi

ye chaar din ki masarraton ka fareb bhi kitna der-pa hai

umid hai lamha lamha dil ko halawat-e-zindagi milegi

kise guman tha ki daur aisa bhi hum pe guzrega zindagi mein

na ishrat-e-KHwajgi milegi na lazzat-e-bandagi milegi

rahe hain muddat se ham-safar hum hai phir bhi beganagi ka aalam

kise KHabar thi ki har tamanna ba-surat-e-ajnabi milegi

jadid tahzib ki rawish par jawan rahe gamzan tu ek din

hawas ke halqe mein nim-uryan bahimiyat nachti milegi

badalte haalat ki numaish hamein ye paigham de rahi hai

inhi andheron se bazm-e-giti ko ek din raushni milegi

ye duniya 'naghmi' hai aati jati nahin hai ye umr-e-jawedani

sajegi jab bhi tumhaari mahfil hamari us mein kami milegi