KHayal-e-jubba-o-dastar bhi nahin baqi

ḳhayāl-e-jubba-o-dastār bhī nahīñ baaqī

vo kashmakash hai ki ik taar bhī nahīñ baaqī

chaman ko rauñd ga.e qāfile bahāroñ ke

guloñ kā zikr hī kyā ḳhaar bhī nahīñ baaqī

lagī huī haiñ zamīr-e-hayāt par mohreñ

kisī meñ jur.at-e-iz.hār bhī nahīñ baaqī

kabhī kabhī jo rag-e-jāñ se phuuT paḌtā hai

vo naġhma-e-rasn-o-dār bhī nahīñ baaqī

hameñ to kufr kā ta.ana diyā thā vaa.iz ne

haram meñ ab koī dīñ-dār bhī nahīñ baaqī

luTā jo apnā gulistāñ to ham ne ye samjhā

koī bahisht ufuq paar bhī nahīñ baaqī

guzar ga.e vo suḳhan-fahmiyoñ ke hañgāme

koī kisī kā taraf-dār bhī nahīñ baaqī

KHayal-e-jubba-o-dastar bhi nahin baqi

wo kashmakash hai ki ek tar bhi nahin baqi

chaman ko raund gae qafile bahaaron ke

gulon ka zikr hi kya KHar bhi nahin baqi

lagi hui hain zamir-e-hayat par mohren

kisi mein jurat-e-izhaar bhi nahin baqi

kabhi kabhi jo rag-e-jaan se phuT paDta hai

wo naghma-e-rasn-o-dar bhi nahin baqi

hamein to kufr ka tana diya tha waiz ne

haram mein ab koi din-dar bhi nahin baqi

luTa jo apna gulistan to hum ne ye samjha

koi bahisht ufuq par bhi nahin baqi

guzar gae wo suKHan-fahmiyon ke hangame

koi kisi ka taraf-dar bhi nahin baqi