KHayal-e-subh ki ranaiyan kuchh aur kahti hain

ḳhayāl-e-sub.h kī ra.anā.iyāñ kuchh aur kahtī haiñ

añdherī raat kī tanhā.iyāñ kuchh aur kahtī haiñ

kabhī jām-e-tarab kī samt dast-e-shauq baḌhtā hai

to us kām-o-dahan kī talḳhiyāñ kuchh aur kahtī haiñ

mirī nazroñ kī pahnā.ī meñ haiñ ajzā-e-do-ālam

gumān-o-vaham kī parchhā.iyāñ kuchh aur kahtī haiñ

farāġhat chāhtī hai zindagī do-chār lamhe kī

magar rāh-e-vafā kī saḳhtiyāñ kuchh aur kahtī haiñ

mirī be-ḳhvāb āñkhoñ meñ Kyayāl-e-sub.h-e-fardā hai

dil-e-bedār kī ḳhāmoshiyāñ kuchh aur kahtī haiñ

KHayal-e-subh ki ranaiyan kuchh aur kahti hain

andheri raat ki tanhaiyan kuchh aur kahti hain

kabhi jam-e-tarab ki samt dast-e-shauq baDhta hai

to us kaam-o-dahan ki talKHiyan kuchh aur kahti hain

meri nazron ki pahnai mein hain ajza-e-do-alam

guman-o-waham ki parchhaiyan kuchh aur kahti hain

faraghat chahti hai zindagi do-chaar lamhe ki

magar rah-e-wafa ki saKHtiyan kuchh aur kahti hain

meri be-KHwab aankhon mein Kyayal-e-subh-e-farda hai

dil-e-bedar ki KHamoshiyan kuchh aur kahti hain