KHayal ki tarah chup ho sada hue hote

ḳhayāl kī tarah chup ho sadā hue hote

kam-az-kam apnī hī āvāz-e-pā hue hote

taras rahā huuñ tumhārī zabāñ se sunñe ko

ki tum kabhī mirā harf-e-vafā hue hote

ajiib kaifīyat-e-be-dilī hai donoñ taraf

ki mil ke soch rahe haiñ judā hue hote

bahut aziiz sahī ham ko apnī ḳhud-dārī

maza to jab thā ki terī anā hue hote

ye aarzū rahī apnī jo umr bhar ke liye

tirī zabāñ pe rahe vo maza hue hote

sumūm kī tarah jiine se fā.eda kiyā hai

kisī ke vāste bād-e-sabā hue hote

hamesha mā.il-e-husn-e-butāñ rahe 'āzar'

kabhī to qā.il-e-husn-e-ḳhudā hue hote

KHayal ki tarah chup ho sada hue hote

kam-az-kam apni hi aawaz-e-pa hue hote

taras raha hun tumhaari zaban se sunne ko

ki tum kabhi mera harf-e-wafa hue hote

ajib kaifiyat-e-be-dili hai donon taraf

ki mil ke soch rahe hain juda hue hote

bahut aziz sahi hum ko apni KHud-dari

maza to jab tha ki teri ana hue hote

ye aarzu rahi apni jo umr bhar ke liye

teri zaban pe rahe wo maza hue hote

sumum ki tarah jine se faeda kiya hai

kisi ke waste baad-e-saba hue hote

hamesha mail-e-husn-e-butan rahe 'azar'

kabhi to qail-e-husn-e-KHuda hue hote