KHayal-o-KHwab ke pechida intishaar se dur

ḳhayāl-o-ḳhvāb ke pechīda intishār se duur

paḌī hai niiñd bhī āñkhoñ ke regzār se duur

jo ḳhāka khīñch liyā hai to kar mukammal bhī

bhaTak rahā huuñ maiñ apne hī shāhkār se duur

bichhaḌ ke tujh se milā hī nahīñ kisī se dil

khaḌī to aur bhī duniyā thī e.atibār se duur

hamī to nasloñ kī taḳhrīb ke haiñ zimmedār

ye kyā bigaḌtī agar rahtī laaD pyaar se duur

mirā pata hai ki gumnāmiyoñ meñ DhūñDo mujhe

paḌā huā huuñ maiñ har ek ishtihār se duur

suḳhanvarī kā ye āsāñ safar nahīñ duniyā

khilāne paḌte haiñ gul bhī yahāñ bahār se duur

akele sirf tumhārī nahīñ hai ye fitrat

ye kā.enāt hī rahtī hai dāġh-dār se duur

KHayal-o-KHwab ke pechida intishaar se dur

paDi hai nind bhi aankhon ke regzar se dur

jo KHaka khinch liya hai to kar mukammal bhi

bhaTak raha hun main apne hi shahkar se dur

bichhaD ke tujh se mila hi nahin kisi se dil

khaDi to aur bhi duniya thi eatibar se dur

hami to naslon ki taKHrib ke hain zimmedar

ye kya bigaDti agar rahti laD pyar se dur

mera pata hai ki gumnamiyon mein DhunDo mujhe

paDa hua hun main har ek ishtihaar se dur

suKHanwari ka ye aasan safar nahin duniya

khilane paDte hain gul bhi yahan bahaar se dur

akele sirf tumhaari nahin hai ye fitrat

ye kaenat hi rahti hai dagh-dar se dur