KHayal-o-KHwab ke sanche mein Dhal gae hum bhi

ḳhayāl-o-ḳhvāb ke sāñche meñ Dhal ga.e ham bhī

ḳhushā-fareb-e-tamannā bahal ga.e ham bhī

hamīñ the pyaar kā sadqa utārne vaale

ki hañs ke jaañ kā labāda badal ga.e ham bhī

sahar nasīb kahāñ sham.a ho ki parvāne

shab-e-firāq tire saath jal ga.e ham bhī

vo kyoñ hoñ tark-e-ta.alluq pe morid-e-ilzām

zamāna dekh rahā hai badal ga.e ham bhī

lahak uThā lab-e-la.alīñ kī baat se ehsās

vo mehrbāñ the ziyāda machal ga.e ham bhī

umaD paḌī thī udāsī nazar thī be-qābū

tumhārā naam jo aaya sañbhal ga.e ham bhī

na zikr-e-ku-e-malāmat karo ki dīvāno

ḳhirad kī raah se aage nikal ga.e ham bhī

vahī nazar vahī garmī vahī adā 'sarmad'

us aa.ine ke muqābil pighal ga.e ham bhī

KHayal-o-KHwab ke sanche mein Dhal gae hum bhi

KHusha-fareb-e-tamanna bahal gae hum bhi

hamin the pyar ka sadqa utarne wale

ki hans ke jaan ka labaada badal gae hum bhi

sahar nasib kahan shama ho ki parwane

shab-e-firaq tere sath jal gae hum bhi

wo kyon hon tark-e-talluq pe morid-e-ilzam

zamana dekh raha hai badal gae hum bhi

lahak uTha lab-e-lalin ki baat se ehsas

wo mehrban the ziyaada machal gae hum bhi

umaD paDi thi udasi nazar thi be-qabu

tumhaara nam jo aaya sanbhal gae hum bhi

na zikr-e-ku-e-malamat karo ki diwano

KHirad ki rah se aage nikal gae hum bhi

wahi nazar wahi garmi wahi ada 'sarmad'

us aaine ke muqabil pighal gae hum bhi