KHayal-o-KHwab ki duniya mein kho gae aaKHir

ḳhayāl-o-ḳhvāb kī duniyā meñ kho ga.e āḳhir

tirī talāsh meñ ham thak ke so ga.e āḳhir

mirī vafāoñ kā hāsil shikast-e-dil hī sahī

fasāne ġham ke mukammal to ho ga.e āḳhir

subūt maañg na ham se vafā-parastī kā

ham apne ban na sake tere ho ga.e āḳhir

vo aa.e jāgtī āñkhoñ meñ ḳhvāb kī sūrat

sitāre tār-e-nazar meñ piro ga.e āḳhir

ba-pās-e-zabt jo palkoñ pe rūnumā na hue

vo ashk dāman-e-dil meñ samo ga.e āḳhir

ba-sad-niyāz jo aañsū gire dam-e-sajda

jabīñ se dāġh-e-nadāmat bhī dho ga.e āḳhir

mizāj-dāñ jinheñ samjhe the mauj-e-tūfāñ kā

vo sāhiloñ pe safīne Dubo ga.e āḳhir

zabāñ se jin kī mohabbat ke phuul jhaḌte the

'tufail' dil meñ vo kāñTe chubho ga.e āḳhir

KHayal-o-KHwab ki duniya mein kho gae aaKHir

teri talash mein hum thak ke so gae aaKHir

meri wafaon ka hasil shikast-e-dil hi sahi

fasane gham ke mukammal to ho gae aaKHir

subut mang na hum se wafa-parasti ka

hum apne ban na sake tere ho gae aaKHir

wo aae jagti aankhon mein KHwab ki surat

sitare tar-e-nazar mein piro gae aaKHir

ba-pas-e-zabt jo palkon pe runuma na hue

wo ashk daman-e-dil mein samo gae aaKHir

ba-sad-niyaz jo aansu gire dam-e-sajda

jabin se dagh-e-nadamat bhi dho gae aaKHir

mizaj-dan jinhen samjhe the mauj-e-tufan ka

wo sahilon pe safine Dubo gae aaKHir

zaban se jin ki mohabbat ke phul jhaDte the

'tufail' dil mein wo kanTe chubho gae aaKHir