KHayal-o-KHwab ki duniya se hum guzar bhi gae

ḳhayāl-o-ḳhvāb kī duniyā se ham guzar bhī ga.e

jahāñ Thaharnā thā ham ko vahāñ Thahar bhī ga.e

hamāre saath rahe zindagī ke hañgāme

jahāñ jahāñ se bhī guzre jidhar jidhar bhī ga.e

tire ḳhayāl kā dariyā utar na paayā magar

tire ḳhayāl ke dariyā meñ ham utar bhī ga.e

zamāna laakh hamārī muḳhālifat meñ rahā

jo kaam karnā thā ham ko vo kaam kar bhī ga.e

mohabbatoñ meñ bhī lāzim hai e'tidāl kā rañg

ḳhulūs had se baḌhā jab to log Dar bhī ga.e

tumhārā naam isī vāste to zinda hai

tumhāre naam pe marnā thā jin ko mar bhī ga.e

ġham-e-ziyāñ ke sivā kuchh nahīñ hai manzil par

safar kā lutf gayā aur ham-safar bhī ga.e

ham aise log munavvar kahāñ se ā.eñge

jo pastiyoñ meñ rahe aur farāz par bhī ga.e

KHayal-o-KHwab ki duniya se hum guzar bhi gae

jahan Thaharna tha hum ko wahan Thahar bhi gae

hamare sath rahe zindagi ke hangame

jahan jahan se bhi guzre jidhar jidhar bhi gae

tere KHayal ka dariya utar na paya magar

tere KHayal ke dariya mein hum utar bhi gae

zamana lakh hamari muKHalifat mein raha

jo kaam karna tha hum ko wo kaam kar bhi gae

mohabbaton mein bhi lazim hai e'tidal ka rang

KHulus had se baDha jab to log Dar bhi gae

tumhaara nam isi waste to zinda hai

tumhaare nam pe marna tha jin ko mar bhi gae

gham-e-ziyan ke siwa kuchh nahin hai manzil par

safar ka lutf gaya aur ham-safar bhi gae

hum aise log munawwar kahan se aaenge

jo pastiyon mein rahe aur faraaz par bhi gae