khel dekha na kabhi khel dikhaya humne

khel dekhā na kabhī khel dikhāyā ham ne

ḳhud ko hone na diyā juzv-e-tamāsha ham ne

darmiyāñ harf bhī aa.e ye gavārā na kiyā

lab pe aane na diyā harf-e-tamannā ham ne

is havāle se bhī ehsān hai un āñkhoñ kā

varna kuuze meñ na dekhā kabhī dariyā ham ne

jhurriyāñ chehre kī mānind zabāñ bol uThīñ

karb tā-'umr 'abas apnā chhupāyā ham ne

phir se kartī hai zamīñ apne safar kā āġhāz

jab bhī fitrat ke taqāzoñ ko na samjhā ham ne

shahr kā shahr baġhāvat pe utar aayā hai

qufl hoñToñ pe na be-vaj.h lagāyā ham ne

'aks āñkhoñ meñ liye shaam kī vīrānī kā

ik diyā naam se us ke bhī jalāyā ham ne

ahl-e-mansab ke qasīde meñ zabāñ kyoñ paḌtī

dil meñ paalī hī nahīñ ḳhvāhish-e-duniyā ham ne

ab 'nazīr' is meñ ho halchal koī ummīd nahīñ

balda-e-jāñ meñ bahut shor machāyā ham ne

khel dekha na kabhi khel dikhaya hum ne

KHud ko hone na diya juzw-e-tamasha hum ne

darmiyan harf bhi aae ye gawara na kiya

lab pe aane na diya harf-e-tamanna hum ne

is hawale se bhi ehsan hai un aankhon ka

warna kuze mein na dekha kabhi dariya hum ne

jhurriyan chehre ki manind zaban bol uThin

karb ta-'umr 'abas apna chhupaya hum ne

phir se karti hai zamin apne safar ka aaghaz

jab bhi fitrat ke taqazon ko na samjha hum ne

shahr ka shahr baghawat pe utar aaya hai

qufl honTon pe na be-wajh lagaya hum ne

'aks aankhon mein liye sham ki virani ka

ek diya nam se us ke bhi jalaya hum ne

ahl-e-mansab ke qaside mein zaban kyon paDti

dil mein pali hi nahin KHwahish-e-duniya hum ne

ab 'nazir' is mein ho halchal koi ummid nahin

balda-e-jaan mein bahut shor machaya hum ne