khel kar silsila-e-gardish-e-ayyam ke sath

khel kar silsila-e-gardish-e-ayyām ke saath

zindagī ham ne guzārī baḌe ārām ke saath

sun rahā huuñ dil-e-barbād ke afsāne meñ

aap kā naam bhī aaya hai mire naam ke saath

shukr-sad-shukr ki muddat pe tujhe shikva-tarāz

yaad to aaya koī saikḌoñ ilzām ke saath

kam-nigāhī se tirī bazm-e-tarab meñ saaqī

dekh āñkheñ na chhalak jaa.eñ kahīñ jaam ke saath

terī yādoñ meñ guzarte hue lamhoñ kī thakan

lutf-e-āġhāz bhī laa.ī ġham-e-anjām ke saath

baḌhtā jaatā hai ujāloñ pe añdheroñ kā asar

sub.h badnām na ho jaa.e kahīñ shaam ke saath

is zamāne meñ gale milte hue dekhā hai

ravish-e-ḳhās ko ham ne ravish-e-ām ke saath

ham bhī khele haiñ lab-e-shāhid-e-mai se 'ahmar'

jur.a-kash ham bhī rahe haiñ kabhī 'ḳhayyām' ke saath

khel kar silsila-e-gardish-e-ayyam ke sath

zindagi hum ne guzari baDe aaram ke sath

sun raha hun dil-e-barbaad ke afsane mein

aap ka nam bhi aaya hai mere nam ke sath

shukr-sad-shukr ki muddat pe tujhe shikwa-taraaz

yaad to aaya koi saikDon ilzam ke sath

kam-nigahi se teri bazm-e-tarab mein saqi

dekh aankhen na chhalak jaen kahin jam ke sath

teri yaadon mein guzarte hue lamhon ki thakan

lutf-e-aghaz bhi lai gham-e-anjam ke sath

baDhta jata hai ujalon pe andheron ka asar

subh badnam na ho jae kahin sham ke sath

is zamane mein gale milte hue dekha hai

rawish-e-KHas ko hum ne rawish-e-am ke sath

hum bhi khele hain lab-e-shahid-e-mai se 'ahmar'

jura-kash hum bhi rahe hain kabhi 'KHayyam' ke sath