khiDki mein lahraate tanha zard gulabon jaise din

khiḌkī meñ lahrāte tanhā zard gulāboñ jaise din

vo takiyoñ par kāḌhe jaane vaale ḳhvāboñ jaise din

bāhar dastak dete mausam chuġhlī khātī tez havā

mez pe rakkhī niiñd se bojhal khulī kitāboñ jaise din

jaane kis ke dil kī dhaḌkan khudī huī thī peḌoñ par

jaate jaate ThiThak ga.e haiñ yūñhī nisāboñ jaise din

ham ko yaad haiñ uḌte phirte titlī jaise sub.h-o-shām

haath meñ jaltā sūraj thāme vo tālāboñ jaise din

kangūroñ se lipTī beleñ aur beloñ pe hañste phuul

biich khañDar ḳhāmosh khaḌī raushan mehrāboñ jaise din

ghor dhueñ ke phaile bādal ruktā saañs gulāboñ kā

daldal jaisī andhī rāteñ aur sarāboñ jaise din

ik muddat se Thahr ga.e haiñ jaise ham donoñ ke biich

vahī savāloñ jaisī rāteñ vahī javāboñ jaise din

khiDki mein lahraate tanha zard gulabon jaise din

wo takiyon par kaDhe jaane wale KHwabon jaise din

bahar dastak dete mausam chughli khati tez hawa

mez pe rakkhi nind se bojhal khuli kitabon jaise din

jaane kis ke dil ki dhaDkan khudi hui thi peDon par

jate jate ThiThak gae hain yunhi nisabon jaise din

hum ko yaad hain uDte phirte titli jaise subh-o-sham

hath mein jalta suraj thame wo talabon jaise din

kanguron se lipTi belen aur belon pe hanste phul

bich khanDar KHamosh khaDi raushan mehrabon jaise din

ghor dhuen ke phaile baadal rukta sans gulabon ka

daldal jaisi andhi raaten aur sarabon jaise din

ek muddat se Thahr gae hain jaise hum donon ke bich

wahi sawalon jaisi raaten wahi jawabon jaise din