khiDki se mahtab na dekho

khiḌkī se mahtāb na dekho

aise bhī tum ḳhvāb na dekho

Duub rahe sūraj meñ yaaro

din kī āb-o-tāb na dekho

harjā.ī haiñ log yahāñ ke

is bastī ke ḳhvāb na dekho

andar se ham TuuT rahe haiñ

bāhar ke asbāb na dekho

fan dekho bas mallāhoñ kā

dariyā ke sailāb na dekho

sachche sapne do āñkhoñ ko

jhūTe hoñ vo ḳhvāb na dekho

dīvāna huuñ dīvāna maiñ

tum mere ādāb na dekho

ġham meñ bhī ham ḳhush rahte haiñ

ġham sahne kī taab na dekho

dekho apne aib 'zafar'-jī

kaise haiñ ahbāb na dekho

khiDki se mahtab na dekho

aise bhi tum KHwab na dekho

Dub rahe suraj mein yaro

din ki aab-o-tab na dekho

harjai hain log yahan ke

is basti ke KHwab na dekho

andar se hum TuT rahe hain

bahar ke asbab na dekho

fan dekho bas mallahon ka

dariya ke sailab na dekho

sachche sapne do aankhon ko

jhuTe hon wo KHwab na dekho

diwana hun diwana main

tum mere aadab na dekho

gham mein bhi hum KHush rahte hain

gham sahne ki tab na dekho

dekho apne aib 'zafar'-ji

kaise hain ahbab na dekho