khiDkiyon se bhi agar dhup na aai hoti

khiḌkiyoñ se bhī agar dhuup na aa.ī hotī

ham ne din hote hue sham' jalā.ī hotī

apnī āñkhoñ ko agar ham bhī bachā le jaate

saañs lete hue manzar se burā.ī hotī

log mar’ūb bahut haiñ tirī mehrāboñ se

bel hī koī sutūnoñ pe chaḌhā.ī hotī

merī āñkhoñ ke darīchoñ meñ sabhī rang us ke

dil kī dīvār bhī kaash us ne sajā.ī hotī

ham ko manzūr na thī qaid-e-vafādārī-e-shah

varna pairoñ meñ bhī zanjīr-e-tilā.ī hotī

saare tehvār guzar jaate haiñ suune suune

ye 'imārat bhī kabhī tum ne sajā.ī hotī

khiDkiyon se bhi agar dhup na aai hoti

hum ne din hote hue sham' jalai hoti

apni aankhon ko agar hum bhi bacha le jate

sans lete hue manzar se burai hoti

log mar’ub bahut hain teri mehrabon se

bel hi koi sutunon pe chaDhai hoti

meri aankhon ke darichon mein sabhi rang us ke

dil ki diwar bhi kash us ne sajai hoti

hum ko manzur na thi qaid-e-wafadari-e-shah

warna pairon mein bhi zanjir-e-tilai hoti

sare tehwar guzar jate hain sune sune

ye 'imarat bhi kabhi tum ne sajai hoti