khinch kar le jaega anjaan mahwar ki taraf

khīñch kar le jā.egā anjān mahvar kī taraf

hai badan kā rāsta bāhar se andar kī taraf

vo bhī apne saañs ke sailāb meñ hai lāpata

jo mujhe phailā gayā mere hī manzar kī taraf

ab ḳhalāoñ ko sameTe har taraf hoñ gāmzan

aaj hai merā safar apne hī paikar kī taraf

koī to paanī kī vīrānī ko samjhegā kabhī

dekhtā rahtā huuñ ab maiñ bhī samundar kī taraf

zehn kī qabroñ meñ phir se suur gūñjā hai 'riyāz'

tañgi-e-iz.hār chal ik aur mahshar kī taraf

khinch kar le jaega anjaan mahwar ki taraf

hai badan ka rasta bahar se andar ki taraf

wo bhi apne sans ke sailab mein hai lapata

jo mujhe phaila gaya mere hi manzar ki taraf

ab KHalaon ko sameTe har taraf hon gamzan

aaj hai mera safar apne hi paikar ki taraf

koi to pani ki virani ko samjhega kabhi

dekhta rahta hun ab main bhi samundar ki taraf

zehn ki qabron mein phir se sur gunja hai 'riyaz'

tangi-e-izhaar chal ek aur mahshar ki taraf