khil uThe sukh ke phul chaaron taraf

khil uThe sukh ke phuul chāroñ taraf

aa.e jab jab rasūl chāroñ taraf

phir mohabbat ne bāñheñ phailā.īñ

phir rahe the malūl chāroñ taraf

maañ kī aa.heñ zarūr lagtī haiñ

āh-e-bint-e-rasūl chāroñ taraf

ek kun kī sadā kī maar haiñ sab

hogā haq kā nuzūl chāroñ taraf

ham bagūloñ kī nazr ho ga.e the

aur uḌtī thī dhuul chāroñ taraf

maiñ ne phūloñ ke ḳhvāb dekhe the

kyoñ ug aa.e babūl chāroñ taraf

us nazar ke javāb meñ gūñjī

ik sadā-e-qubūl chāroñ taraf

jaane vāloñ ne 'ahd toḌ diye

ban ga.e the usuul chāroñ taraf

adab-ādāb kho ga.e haiñ kahīñ

ban rahe haiñ schōl chāroñ taraf

khil uThe sukh ke phul chaaron taraf

aae jab jab rasul chaaron taraf

phir mohabbat ne banhen phailain

phir rahe the malul chaaron taraf

man ki aahen zarur lagti hain

aah-e-bint-e-rasul chaaron taraf

ek kun ki sada ki mar hain sab

hoga haq ka nuzul chaaron taraf

hum bagulon ki nazr ho gae the

aur uDti thi dhul chaaron taraf

main ne phulon ke KHwab dekhe the

kyon ug aae babul chaaron taraf

us nazar ke jawab mein gunji

ek sada-e-qubul chaaron taraf

jaane walon ne 'ahd toD diye

ban gae the usul chaaron taraf

adab-adab kho gae hain kahin

ban rahe hain school chaaron taraf