KHilaf-e-gardish-e-mamul hona chahta hun

ḳhilāf-e-gardish-e-ma.amūl honā chāhtā huuñ

madad kar shahr-e-nā-maqbūl honā chāhtā huuñ

chalo apnī taraf se band kar lo merī āñkheñ

maiñ apne aap meñ mashġhūl honā chāhtā huuñ

tire qadmoñ pe rakh dī dekh ye dastār maiñ ne

ki apne aap se māzūl honā chāhtā huuñ

maiñ rahnā chāhtā huuñ tere dāman se lipaT kar

so tere rāste kī dhuul honā chāhtā huuñ

sadā-e-lams-e-lab de bhī ki maiñ ġhuncha suḳhan kā

bahut din ho ga.e ab phuul honā chāhtā huuñ

tavajjoh huuñ magar markūz duniyā par huuñ kab se

ab aap apnī taraf mabzūl honā chāhtā huuñ

badan ke haath kā likkhā huā huuñ ishq-nāma

aur apnī ruuh ko mausūl honā chāhtā huuñ

mujhe ghar bhī chalānā hai ab apnā 'farhat-ehsās'

to kuchh din ke liye ma.aqūl honā chāhtā huuñ

KHilaf-e-gardish-e-mamul hona chahta hun

madad kar shahr-e-na-maqbul hona chahta hun

chalo apni taraf se band kar lo meri aankhen

main apne aap mein mashghul hona chahta hun

tere qadmon pe rakh di dekh ye dastar main ne

ki apne aap se mazul hona chahta hun

main rahna chahta hun tere daman se lipaT kar

so tere raste ki dhul hona chahta hun

sada-e-lams-e-lab de bhi ki main ghuncha suKHan ka

bahut din ho gae ab phul hona chahta hun

tawajjoh hun magar markuz duniya par hun kab se

ab aap apni taraf mabzul hona chahta hun

badan ke hath ka likkha hua hun ishq-nama

aur apni ruh ko mausul hona chahta hun

mujhe ghar bhi chalana hai ab apna 'farhat-ehsas'

to kuchh din ke liye maqul hona chahta hun