khilaunon ki dukan par dard ka shahkar laya hun

khilaunoñ kī dukāñ par dard kā shahkār laayā huuñ

ye kuchh aañsū haiñ jin ko bechne bāzār aaya huuñ

nigāhoñ se baraste sard sho.aloñ kī kahānī ko

ġhazal kā ruup de kar aap kī mahfil meñ laayā huuñ

tasavvur ke ufuq par jagmagāte chāñd tāroñ ko

añdherī bastiyoñ ke naam ik paiġhām laayā huuñ

sunā.ūñ to ye Dar hai aap par bār-e-garāñ hogā

vo ik saada sā afsāna jise āñkhoñ meñ paayā huuñ

zarā nazreñ uThā kar muskurā kar dekh to liije

baḌī ummīd le kar aap kī mahfil meñ aaya huuñ

ġham-o-dard-o-alam ke tez tūfānoñ kī godī meñ

jo sadiyoñ se rahā hai maiñ usī hastī kā saayā huuñ

jise duniyā ne baḌh kar zindagī kā naam de Daalā

usī be-rabt sī ḳhvāhish kā 'sādiq' maiñ satāyā huuñ

khilaunon ki dukan par dard ka shahkar laya hun

ye kuchh aansu hain jin ko bechne bazar aaya hun

nigahon se baraste sard shoalon ki kahani ko

ghazal ka rup de kar aap ki mahfil mein laya hun

tasawwur ke ufuq par jagmagate chand taron ko

andheri bastiyon ke nam ek paigham laya hun

sunaun to ye Dar hai aap par bar-e-garan hoga

wo ek sada sa afsana jise aankhon mein paya hun

zara nazren uTha kar muskura kar dekh to lije

baDi ummid le kar aap ki mahfil mein aaya hun

gham-o-dard-o-alam ke tez tufanon ki godi mein

jo sadiyon se raha hai main usi hasti ka saya hun

jise duniya ne baDh kar zindagi ka nam de Dala

usi be-rabt si KHwahish ka 'sadiq' main sataya hun