KHilqat-e-shahr kahan yar mujhe dekhti hai

ḳhilqat-e-shahr kahāñ yaar mujhe dekhtī hai

bas tirī aañkh lagātār mujhe dekhtī hai

maiñ ne hī gosha-nashīnī ko na chhoḌā varna

aaj bhī raunaq-e-bāzār mujhe dekhtī hai

terā maqsūd hai elān-e-muāfī to phir

kyoñ tire haath kī talvār mujhe dekhtī hai

vaise to fā.eda koī nahīñ shab-ḳhezī kā

sub.h hote hue bedār mujhe dekhtī hai

hālat-e-vasl ke baad aisā lagā thā mujh ko

zindagī terī tarah yaar mujhe dekhtī hai

jab maiñ us shaḳhs ke har zulm pe ḳhāmosh rahūñ

chauñk kar tāqat-e-guftār mujhe dekhtī hai

hijr ke āḳhirī zindāñ meñ muqayyad huuñ jahāñ

dar nahīñ dekhtā dīvār mujhe dekhtī hai

haath baḌh jaa.e agar luqma-e-tar kī jānib

nisbat-e-haidar-e-karrār mujhe dekhtī hai

apnī mahrūmī kisī tarah chhupā saktā nahīñ

aise vo shāḳh-e-samar-dār mujhe dekhtī hai

ek us shaḳhs ne jaate nahīñ dekhā mujh ko

varna duniyā to ka.ī baar mujhe dekhtī hai

KHilqat-e-shahr kahan yar mujhe dekhti hai

bas teri aankh lagatar mujhe dekhti hai

main ne hi gosha-nashini ko na chhoDa warna

aaj bhi raunaq-e-bazar mujhe dekhti hai

tera maqsud hai elan-e-muafi to phir

kyon tere hath ki talwar mujhe dekhti hai

waise to faeda koi nahin shab-KHezi ka

subh hote hue bedar mujhe dekhti hai

haalat-e-wasl ke baad aisa laga tha mujh ko

zindagi teri tarah yar mujhe dekhti hai

jab main us shaKHs ke har zulm pe KHamosh rahun

chaunk kar taqat-e-guftar mujhe dekhti hai

hijr ke aaKHiri zindan mein muqayyad hun jahan

dar nahin dekhta diwar mujhe dekhti hai

hath baDh jae agar luqma-e-tar ki jaanib

nisbat-e-haidar-e-karrar mujhe dekhti hai

apni mahrumi kisi tarah chhupa sakta nahin

aise wo shaKH-e-samar-dar mujhe dekhti hai

ek us shaKHs ne jate nahin dekha mujh ko

warna duniya to kai bar mujhe dekhti hai