khilte khilte gul murjhana main bhi dekhun tu bhi dekh

khilte khilte gul murjhānā maiñ bhī dekhūñ tū bhī dekh

hañste hañste aañsū aana maiñ bhī dekhūñ tū bhī dekh

mauqa bhī hai fursat bhī hai aur guloñ par rangat bhī

mausam kā andāz suhānā maiñ bhī dekhūñ tū bhī dekh

kis ne ye zulfeñ kholī haiñ bhīgā bhīgā mausam hai

bādal kā ye aag lagānā maiñ bhī dekhūñ tū bhī dekh

sunte haiñ ye bāġh-e-ḳhushī hai duur yahāñ ġham hotā hai

is ko kahte haiñ mai-ḳhāna maiñ bhī dekhūñ tū bhī dekh

duur ġham-e-duniyā se rah kar pyaar ke naġhme ham gaa.eñ

nazmoñ kā dil par chhā jaanā maiñ bhī dekhūñ tū bhī dekh

andar andar maiñ bikhrī huuñ bāhar bāhar tū bikhrā

ulfat kā aisā nazrāna maiñ bhī dekhūñ tū bhī dekh

khilte khilte gul murjhana main bhi dekhun tu bhi dekh

hanste hanste aansu aana main bhi dekhun tu bhi dekh

mauqa bhi hai fursat bhi hai aur gulon par rangat bhi

mausam ka andaz suhana main bhi dekhun tu bhi dekh

kis ne ye zulfen kholi hain bhiga bhiga mausam hai

baadal ka ye aag lagana main bhi dekhun tu bhi dekh

sunte hain ye bagh-e-KHushi hai dur yahan gham hota hai

is ko kahte hain mai-KHana main bhi dekhun tu bhi dekh

dur gham-e-duniya se rah kar pyar ke naghme hum gaen

nazmon ka dil par chha jaana main bhi dekhun tu bhi dekh

andar andar main bikhri hun bahar bahar tu bikhra

ulfat ka aisa nazrana main bhi dekhun tu bhi dekh