خرام ناز گلچیں دیکھ کر باد صبا ٹھہرے

خرام ناز گلچیں دیکھ کر باد صبا ٹھہرے

بجائیں چٹکیاں غنچے تو بلبل کی صدا ٹھہرے

کبھی ہونٹوں پہ آ ٹھہرے کبھی آنکھوں میں آ ٹھہرے

الگ ہو کر بھلا تجھ سے دل بیتاب کیا ٹھہرے

نہ ہم منت کش ساحل نہ ہم مرہون طوفاں ہیں

ہم اپنی کشتیٔ ہستی کے خود ہی ناخدا ٹھہرے

مجھے شام و سحر کا خوف کیا راہ محبت میں

شب غم صبح ہجراں دونوں میرے ہم نوا ٹھہرے

ہزاروں سر پھرے سر آب سالن پر اٹھاتے ہیں

کبھی طوفان کی زد میں بھی کوئی بلبلا ٹھہرے

ہم اپنے آنسوؤں کی بس یہی معراج سمجھے ہیں

ترے دامن سے ہٹ کر کیوں کہیں یہ قافلہ ٹھہرے

ترے چہرے کے خط و خال کوئی کیا سمجھ پائے

ترے مد مقابل جب نہ کوئی آئنہ ٹھہرے

جو کل تک واقعی منکر تھے آئین محبت کے

وہی ان کی نظر میں آج پابند وفا ٹھہرے

رہ حق سے ہمیں یہ اہل باطل کیا ہٹائیں گے

کہیں بھی امتحاں لے لیں کہیں بھی کربلا ٹھہرے

رہو دنیا میں اخلاص و مروت کا شجر بن کر

تمہارے سائے میں ہر آشنا ناآشنا ٹھہرے

ظہورؔ ناتواں مرنے سے گھبراتا نہیں لیکن

ابھی مصروف یاد دوست ہے کہہ دو قضا ٹھہرے