KHiram-e-naz-e-gulchin dekh kar baad-e-saba Thahre

ḳhirām-e-nāz-e-gulchīñ dekh kar bād-e-sabā Thahre

bajā.eñ chuTkiyāñ ġhunche to bulbul kī sadā Thahre

kabhī hoñToñ pe aa Thahre kabhī āñkhoñ meñ aa Thahre

alag ho kar bhalā tujh se dil-e-betāb kyā Thahre

na ham minnat-kash-e-sāhil na ham marhūn-e-tūfāñ haiñ

ham apnī kashtī-e-hastī ke ḳhud hī nāḳhudā Thahre

mujhe shām-o-sahar kā ḳhauf kyā rāh-e-mohabbat meñ

shab-e-ġham sub.h-e-hijrāñ donoñ mere ham-navā Thahre

hazāroñ sar-phire sar āb-e-sālan par uThāte haiñ

kabhī tūfān kī zad meñ bhī koī bilbilā Thahre

ham apne āñsuoñ kī bas yahī me'rāj samjhe haiñ

tire dāman se haT kar kyoñ kahīñ ye qāfila Thahre

tire chehre ke ḳhatt-o-ḳhāl koī kyā samajh paa.e

tire madd-e-muqābil jab na koī aa.ina Thahre

jo kal tak vāqa'ī munkir the ā.īn-e-mohabbat ke

vahī un kī nazar meñ aaj pāband-e-vafā Thahre

rah-e-haq se hameñ ye ahl-e-bātil kyā haTā.eñge

kahīñ bhī imtihāñ le leñ kahīñ bhī karbalā Thahre

raho duniyā meñ iḳhlās-o-muravvat kā shajar ban kar

tumhāre saa.e meñ har āshnā nā-āshnā Thahre

'zuhūr'-e-nā-tavāñ marne se ghabrātā nahīñ lekin

abhī masrūf-e-yād-e-dost hai kah do qazā Thahre

KHiram-e-naz-e-gulchin dekh kar baad-e-saba Thahre

bajaen chuTkiyan ghunche to bulbul ki sada Thahre

kabhi honTon pe aa Thahre kabhi aankhon mein aa Thahre

alag ho kar bhala tujh se dil-e-betab kya Thahre

na hum minnat-kash-e-sahil na hum marhun-e-tufan hain

hum apni kashti-e-hasti ke KHud hi naKHuda Thahre

mujhe sham-o-sahar ka KHauf kya rah-e-mohabbat mein

shab-e-gham subh-e-hijran donon mere ham-nawa Thahre

hazaron sar-phire sar aab-e-salan par uThate hain

kabhi tufan ki zad mein bhi koi bilbila Thahre

hum apne aansuon ki bas yahi me'raj samjhe hain

tere daman se haT kar kyon kahin ye qafila Thahre

tere chehre ke KHatt-o-KHal koi kya samajh pae

tere madd-e-muqabil jab na koi aaina Thahre

jo kal tak waqa'i munkir the aain-e-mohabbat ke

wahi un ki nazar mein aaj paband-e-wafa Thahre

rah-e-haq se hamein ye ahl-e-baatil kya haTaenge

kahin bhi imtihan le len kahin bhi karbala Thahre

raho duniya mein iKHlas-o-murawwat ka shajar ban kar

tumhaare sae mein har aashna na-ashna Thahre

'zuhur'-e-na-tawan marne se ghabraata nahin lekin

abhi masruf-e-yaad-e-dost hai kah do qaza Thahre