KHirad ke maktab mein zindagi ke shuur ki aagahi nahin hai

ḳhirad ke maktab meñ zindagī ke shu.ūr kī āgahī nahīñ hai

charāġh tāqoñ pe jal rahe haiñ magar kahīñ raushnī nahīñ hai

tumhārā maslak hai but-parastī ham apne hāthoñ ko pūjte haiñ

ḳhudā banāte haiñ pattharoñ ko ye fann-e-dast-e-ḳhudī nahīñ hai

tumhāre ahd-e-shabāb ko ham ḳhamosh nazroñ se dekhte haiñ

ise bhī tum ehtijāj samjho ye ḳhāmushī ḳhāmushī nahīñ hai

maiñ ranj-o-ġham meñ bhī muskurā kar fareb detā huuñ zindagī ko

jo mere hoñToñ pe murta.ish hai vo mauj-e-ġham hai hañsī nahīñ hai

ye bikhre bikhre se ḳhushk patte alāmateñ haiñ tabāhiyoñ kī

ravish ravish gulsitāñ kī 'hāmī' ḳhizāñ ḳhizāñ chīḳhtī nahīñ hai

KHirad ke maktab mein zindagi ke shuur ki aagahi nahin hai

charagh taqon pe jal rahe hain magar kahin raushni nahin hai

tumhaara maslak hai but-parasti hum apne hathon ko pujte hain

KHuda banate hain pattharon ko ye fann-e-dast-e-KHudi nahin hai

tumhaare ahd-e-shabab ko hum KHamosh nazron se dekhte hain

ise bhi tum ehtijaj samjho ye KHamushi KHamushi nahin hai

main ranj-o-gham mein bhi muskura kar fareb deta hun zindagi ko

jo mere honTon pe murtaish hai wo mauj-e-gham hai hansi nahin hai

ye bikhre bikhre se KHushk patte alamaten hain tabahiyon ki

rawish rawish gulsitan ki 'hami' KHizan KHizan chiKHti nahin hai