KHirad ke raste mein ek moD aisa bhi aaya tha

ḳhirad ke rāste meñ ek moḌ aisā bhī aayā thā

jahāñ har aadmī insāñ na thā insāñ kā saaya thā

musībat ne hameñ ek ā.ina-ḳhāna dikhāyā thā

ki jis meñ muḳhlisoñ kā ek ik chehra parāyā thā

miTā.ī thī jinhoñ ne la.anat-e-dār-o-rasan pahle

unhī ko yaar logoñ ne salīboñ par chaḌhāyā thā

zamāna kapkapātā thā tumhārī sard-mehrī se

diloñ ko tāpne sūraj ġhamoñ kī dhuup laayā thā

vo dīvār-e-shikasta aaj tak phirtī hai āñkhoñ meñ

ki jis ko thaam kar ham ne bhī ik ehsāñ uThāyā thā

kisī ne bhī na dekhā jal rahā thā āshiyāñ kis kā

dhuāñ kuchh is qadar gulshan ke aivānoñ pe chhāyā thā

ka.ī pyāse talāsh-e-āb meñ sahrā meñ aa.e the

vahī manzar dobāra zehn ke ḳhvāboñ meñ aayā thā

azal se be-sadā thā band thā jo sāz-e-hastī meñ

tumheñ bhī yaad hogā ham ne vo naġhma sunāyā thā

ġham āḳhir ġham hai 'ashraf' be-niyām-e-chārasāzī hai

tabassum kā bhī logoñ ne sunā hai zahr khāyā thā

KHirad ke raste mein ek moD aisa bhi aaya tha

jahan har aadmi insan na tha insan ka saya tha

musibat ne hamein ek aaina-KHana dikhaya tha

ki jis mein muKHlison ka ek ek chehra paraya tha

miTai thi jinhon ne lanat-e-dar-o-rasan pahle

unhi ko yar logon ne salibon par chaDhaya tha

zamana kapkapata tha tumhaari sard-mehri se

dilon ko tapne suraj ghamon ki dhup laya tha

wo diwar-e-shikasta aaj tak phirti hai aankhon mein

ki jis ko tham kar hum ne bhi ek ehsan uThaya tha

kisi ne bhi na dekha jal raha tha aashiyan kis ka

dhuan kuchh is qadar gulshan ke aiwanon pe chhaya tha

kai pyase talash-e-ab mein sahra mein aae the

wahi manzar dobara zehn ke KHwabon mein aaya tha

azal se be-sada tha band tha jo saz-e-hasti mein

tumhein bhi yaad hoga hum ne wo naghma sunaya tha

gham aaKHir gham hai 'ashraf' be-niyam-e-chaarasazi hai

tabassum ka bhi logon ne suna hai zahr khaya tha