KHirad ki chhanw mein nind aa rahi hai

ḳhirad kī chhāñv meñ niiñd aa rahī hai

kahāñ ġhairat junūñ kī kho ga.ī hai

mujhe tere tasavvur ne sambhālā

jahāñ bhī gardish-e-daurāñ milī hai

huī muddat jalā thā āshiyāna

nigāhoñ meñ abhī tak raushnī hai

jahāñ vo chalte chalte ruk ga.e haiñ

vahāñ gardish falak kī tham ga.ī hai

mire ashkoñ kī tābānī se hamdam

shab-e-furqat kī zulmat kāñptī hai

ye merā zauq-e-nazzāra salāmat

har ik sūrat meñ sūrat aap kī hai

kahāñ jā.ūñ nikal kar mai-kade se

rah-e-dair-o-haram meñ tīrgī hai

sambhal kar paañv rakh ai vahshat-e-dil

vafā kī rahguzar kāñToñ bharī hai

had-e-idrāk meñ dam toḌnā kyā

junūn-e-ishq meñ zinda-dilī hai

ġham-e-insāñ ġham-e-daurāñ ġham-e-dil

'hayāt' ab kashmakash meñ zindagī hai

KHirad ki chhanw mein nind aa rahi hai

kahan ghairat junun ki kho gai hai

mujhe tere tasawwur ne sambhaala

jahan bhi gardish-e-dauran mili hai

hui muddat jala tha aashiyana

nigahon mein abhi tak raushni hai

jahan wo chalte chalte ruk gae hain

wahan gardish falak ki tham gai hai

mere ashkon ki tabani se hamdam

shab-e-furqat ki zulmat kanpti hai

ye mera zauq-e-nazzara salamat

har ek surat mein surat aap ki hai

kahan jaun nikal kar mai-kade se

rah-e-dair-o-haram mein tirgi hai

sambhal kar panw rakh ai wahshat-e-dil

wafa ki rahguzar kanTon bhari hai

had-e-idrak mein dam toDna kya

junun-e-ishq mein zinda-dili hai

gham-e-insan gham-e-dauran gham-e-dil

'hayat' ab kashmakash mein zindagi hai