KHirad ki rah mein har moD par dhoke nikal aae

ḳhirad kī raah meñ har moḌ par dhoke nikal aa.e

bisāt-e-amn par bhī jañg ke naqshe nikal aa.e

zarūrī hai ham apnī zindagī ko aa.ina rakkheñ

ye chādar kaun oḌhegā agar dhabbe nikal aa.e

mohabbat kā use iqrār karnā hī paḌā lekin

ye sūkhe peḌ se kaise hare patte nikal aa.e

bahut din ba.ad jab maiñ ne ḳhudī kā aa.ina dekhā

to ḳhud mere hī chehre se ka.ī chehre nikal aa.e

kabhī haare sipāhī kī tarah vāpas nahīñ palTe

ham aañsū kī tarah ik baar jo ghar se nikal aa.e

hathelī par ugānā chāhte haiñ khet sarsoñ ke

mire bachche to apnī umr se aage nikal aa.e

julūs-e-amn jab niklā to ham ne 'shauq' ye dekhā

kahīñ ḳhanjar nikal aa.e kahīñ neze nikal aa.e

KHirad ki rah mein har moD par dhoke nikal aae

bisat-e-amn par bhi jang ke naqshe nikal aae

zaruri hai hum apni zindagi ko aaina rakkhen

ye chadar kaun oDhega agar dhabbe nikal aae

mohabbat ka use iqrar karna hi paDa lekin

ye sukhe peD se kaise hare patte nikal aae

bahut din baad jab main ne KHudi ka aaina dekha

to KHud mere hi chehre se kai chehre nikal aae

kabhi haare sipahi ki tarah wapas nahin palTe

hum aansu ki tarah ek bar jo ghar se nikal aae

hatheli par ugana chahte hain khet sarson ke

mere bachche to apni umr se aage nikal aae

julus-e-amn jab nikla to hum ne 'shauq' ye dekha

kahin KHanjar nikal aae kahin neze nikal aae