KHirad zindagi bhar uDanon mein thi

ḳhirad zindagī bhar uḌānoñ meñ thī

nazar be-karāñ āsmānoñ meñ thī

kahāñ qīmtī barf-dānoñ meñ thī

latāfat to jalte makānoñ meñ thī

Thikāne pe koī parinda na thā

'ajab be-amānī Thikānoñ meñ thī

sunā.ī na detī thī koī sadā

vahī ek āvāz kānoñ meñ thī

yahāñ thā maiñ lekin yahīñ kā na thā

zamīñ to mirī āsmānoñ meñ thī

ravāñ thī samundar pe jo ret ke

vo kashtī kaḌe imtihānoñ meñ thī

zarā der kyā raat bārish huī

namī hī namī sā.ebānoñ meñ thī

jo aatī nahīñ thī kisī daam meñ

vo chiḌiyā bhī mere nishānoñ meñ thī

maiñ us gul kī ḳhushbū meñ tahlīl thā

mahak jis kī donoñ jahānoñ meñ thī

maiñ terā hī thā muntazir ai ajal

ki baaqī tū hī mehrbānoñ meñ thī

haqīqat meñ 'vasfī' vo merī na thī

jo sūrat mirī ḳhush-gumānoñ meñ thī

KHirad zindagi bhar uDanon mein thi

nazar be-karan aasmanon mein thi

kahan qimti barf-danon mein thi

latafat to jalte makanon mein thi

Thikane pe koi parinda na tha

'ajab be-amani Thikanon mein thi

sunai na deti thi koi sada

wahi ek aawaz kanon mein thi

yahan tha main lekin yahin ka na tha

zamin to meri aasmanon mein thi

rawan thi samundar pe jo ret ke

wo kashti kaDe imtihanon mein thi

zara der kya raat barish hui

nami hi nami saebanon mein thi

jo aati nahin thi kisi dam mein

wo chiDiya bhi mere nishanon mein thi

main us gul ki KHushbu mein tahlil tha

mahak jis ki donon jahanon mein thi

main tera hi tha muntazir ai ajal

ki baqi tu hi mehrbanon mein thi

haqiqat mein 'wasfi' wo meri na thi

jo surat meri KHush-gumanon mein thi