KHizan jo aai bahaaron ne sath chhoD diya

ḳhizāñ jo aa.ī bahāroñ ne saath chhoḌ diyā

paḌā jo vaqt to yāroñ ne saath chhoḌ diyā

gila kareñ bhī to ġhairoñ kā kis tarah se kareñ

hamārā jab ki hamāroñ ne saath chhoḌ diyā

jinhoñ ne apnā banāyā thā zindagī meñ kabhī

unhīñ hasīn sahāroñ ne saath chhoḌ diyā

tamām raat sitāroñ se guftugū meñ kaTī

sahar huī to sitāroñ ne saath chhoḌ diyā

maiñ ḳhud hī ġharq-e-tamannā huā huuñ ai 'māhir'

vo kah rahe haiñ kināroñ ne saath chhoḌ diyā

KHizan jo aai bahaaron ne sath chhoD diya

paDa jo waqt to yaron ne sath chhoD diya

gila karen bhi to ghairon ka kis tarah se karen

hamara jab ki hamaron ne sath chhoD diya

jinhon ne apna banaya tha zindagi mein kabhi

unhin hasin sahaaron ne sath chhoD diya

tamam raat sitaron se guftugu mein kaTi

sahar hui to sitaron ne sath chhoD diya

main KHud hi gharq-e-tamanna hua hun ai 'mahir'

wo kah rahe hain kinaron ne sath chhoD diya