KHizan ke daur mein khilti bahaar mere liye

ḳhizāñ ke daur meñ khiltī bahār mere liye

ḳhudā ne bhejā hai ik ġham-gusār mere liye

vo kah rahā hai maiñ us ko 'azīz huuñ itnī

karegā vaqf vo lail-o-nahār mere liye

kaThin safar ye agar us ke saath guzre to

ye sang-o-ḳhisht bhī haiñ lāla-zār mere liye

kaḌā hai vaqt to nazreñ churā ke guzrā hai

jo kar rahā thā zamāna nisār mere liye

sunā hai nazmeñ bhī likhtā hai ab judā.ī par

ki ho rahā hai baḌā dil-figār mere liye

dar-e-batūl kī adnā sī ik kanīz huuñ maiñ

yahī havāla hai sad-iftiḳhār mere liye

KHizan ke daur mein khilti bahaar mere liye

KHuda ne bheja hai ek gham-gusar mere liye

wo kah raha hai main us ko 'aziz hun itni

karega waqf wo lail-o-nahaar mere liye

kaThin safar ye agar us ke sath guzre to

ye sang-o-KHisht bhi hain lala-zar mere liye

kaDa hai waqt to nazren chura ke guzra hai

jo kar raha tha zamana nisar mere liye

suna hai nazmen bhi likhta hai ab judai par

ki ho raha hai baDa dil-figar mere liye

dar-e-batul ki adna si ek kaniz hun main

yahi hawala hai sad-iftiKHar mere liye