KHizan ke zaKHm hawa ki mahak se bharne lage

ḳhizāñ ke zaḳhm havā kī mahak se bharne lage

nigār-e-gul ke ḳhad-o-ḳhāl phir nikharne lage

ye sūkhe sahme shajar dekh march aane par

tere badan kī tarah shāḳh shāḳh bharne lage

ġham-e-hayāt phir aane lagī sadā-e-jaras

dayār-e-shab se tire qāfile guzarne lage

udaas raat ke darvāze vā haiñ jaise abhī

dar-e-nigāh se dil meñ koī utarne lage

sarāb-e-dasht-e-tamannā se kaun guzrā hai

ki chashma-e-ġham-e-dil buuñd buuñd jharne lage

ye jhilmilāte sitāre ye zakhm-e-sīna-e-shab

ufuq ke pahle ujāle se jaise bharne lage

nujūm-e-shab kī zabāñ par hai gufta-e-'iqbāl'

vo phir se ādam-e-ḳhākī kī baat karne lage

zamīñ se duur bhī ab naqsh-e-pā-e-insāñ se

ka.ī jahān ḳhalā meñ na.e ubharne lage

vo abr-e-rāh-guzar kī tahoñ meñ Duubā chāñd

havā chale to abhī tair kar ubharne lage

hai us ke aks kī tajsīm mere fan se varā

vo aa.ine ki sadā kī tarah bikharne lage

vo abr ho ki dhanak ho koī to ho 'ḳhāvar'

fazā ke shāne pe jo zulf sā sañvarne lage

KHizan ke zaKHm hawa ki mahak se bharne lage

nigar-e-gul ke KHad-o-KHal phir nikharne lage

ye sukhe sahme shajar dekh march aane par

tere badan ki tarah shaKH shaKH bharne lage

gham-e-hayat phir aane lagi sada-e-jaras

dayar-e-shab se tere qafile guzarne lage

udas raat ke darwaze wa hain jaise abhi

dar-e-nigah se dil mein koi utarne lage

sarab-e-dasht-e-tamanna se kaun guzra hai

ki chashma-e-gham-e-dil bund bund jharne lage

ye jhilmilate sitare ye zakhm-e-sina-e-shab

ufuq ke pahle ujale se jaise bharne lage

nujum-e-shab ki zaban par hai gufta-e-'iqbaal'

wo phir se aadam-e-KHaki ki baat karne lage

zamin se dur bhi ab naqsh-e-pa-e-insan se

kai jahan KHala mein nae ubharne lage

wo abr-e-rah-guzar ki tahon mein Duba chand

hawa chale to abhi tair kar ubharne lage

hai us ke aks ki tajsim mere fan se wara

wo aaine ki sada ki tarah bikharne lage

wo abr ho ki dhanak ho koi to ho 'KHawar'

faza ke shane pe jo zulf sa sanwarne lage