KHizan ki chah mein khilte chaman ko chhoD diya

ḳhizāñ kī chaah meñ khilte chaman ko chhoḌ diyā

talāsh-e-rizq meñ nikalne vatan ko chhoḌ diyā

chale the ghar se asāse meñ hijrateñ le kar

tamām umr kī dil meñ chubhan ko chhoḌ diyā

lagā kuchh aisā jo bichhḌe ham apne pyāroñ se

ki jaise ruuh ne apne badan ko chhoḌ diyā

unhī ke dam se sañvarte the sab hunar mere

jo vo nahīñ haiñ to har ek fan ko chhoḌ diyā

vo jis ke vasl meñ naġhme likhe kabhī ham ne

usī ke hijr meñ ham ne suḳhan ko chhoḌ diyā

ab us kī yaad meñ rātoñ kā chain khote haiñ

'qamar' ye kis se kaheñ kyoñ vatan ko chhoḌ diyā

KHizan ki chah mein khilte chaman ko chhoD diya

talash-e-rizq mein nikalne watan ko chhoD diya

chale the ghar se asase mein hijraten le kar

tamam umr ki dil mein chubhan ko chhoD diya

laga kuchh aisa jo bichhDe hum apne pyaron se

ki jaise ruh ne apne badan ko chhoD diya

unhi ke dam se sanwarte the sab hunar mere

jo wo nahin hain to har ek fan ko chhoD diya

wo jis ke wasl mein naghme likhe kabhi hum ne

usi ke hijr mein hum ne suKHan ko chhoD diya

ab us ki yaad mein raaton ka chain khote hain

'qamar' ye kis se kahen kyon watan ko chhoD diya