KHizan ki sham ke manzar ko bhar Dala parindon ne

ḳhizāñ kī shaam ke manzar ko bhar Daalā parindoñ ne

ufuq ko aur bhī tārīk kar Daalā parindoñ ne

mujhe phir kaun sī miTTī meñ ab ke sar uThānā hai

ye ik qarza bhī mere naam par Daalā parindoñ ne

lahū meñ kuchh na ho phir bhī lahū kī bū to hotī hai

ḳhud apne hī lahū ko ḳhvār kar Daalā parindoñ ne

thake-hāre jahāñ shab-bhar baserā karne aa.e the

charindoñ kī tarah vo khet char Daalā parindoñ ne

vo rut aa.ī havā sab ho ga.e patte daraḳhtoñ ke

magar yuuñ bhī huā shāḳhoñ ko bhar Daalā parindoñ ne

ye koshish thī ki bāham daam ko hī le uḌeñ lekin

tane halqoñ ko itne meñ kutar Daalā parindoñ ne

hameñ ma.alūm hai kab kaun dahshat-gard bantā hai

shikam kī aag ko hathiyār kar Daalā parindoñ ne

vahāñ 'shāhīn' chhājoñ der tak rahmat barastī hai

sar-e-gulzār dhyān apnā jidhar Daalā parindoñ ne

KHizan ki sham ke manzar ko bhar Dala parindon ne

ufuq ko aur bhi tarik kar Dala parindon ne

mujhe phir kaun si miTTi mein ab ke sar uThana hai

ye ek qarza bhi mere nam par Dala parindon ne

lahu mein kuchh na ho phir bhi lahu ki bu to hoti hai

KHud apne hi lahu ko KHwar kar Dala parindon ne

thake-haare jahan shab-bhar basera karne aae the

charindon ki tarah wo khet char Dala parindon ne

wo rut aai hawa sab ho gae patte daraKHton ke

magar yun bhi hua shaKHon ko bhar Dala parindon ne

ye koshish thi ki baham dam ko hi le uDen lekin

tane halqon ko itne mein kutar Dala parindon ne

hamein malum hai kab kaun dahshat-gard banta hai

shikam ki aag ko hathiyar kar Dala parindon ne

wahan 'shahin' chhajon der tak rahmat barasti hai

sar-e-gulzar dhyan apna jidhar Dala parindon ne