KHizan ki zad mein gul-e-tar hai kya kiya jae

ḳhizāñ kī zad meñ gul-e-tar hai kyā kiyā jaa.e

yahī chaman kā muqaddar hai kyā kiyā jaa.e

dil-o-nigāh ko jis se sukūñ mayassar thā

lahū lahū vahī manzar hai kyā kiyā jaa.e

buland-o-past kā har imtiyāz be-ma.anī

ajiib vaqt kā tevar hai kyā kiyā jaa.e

ḳhudā kā shukr hai jis haal meñ guzar jaa.e

ik intishār to ghar ghar hai kyā kiyā jaa.e

zabāñ se phuul baraste haiñ guftugū aisī

aur āstīnoñ meñ ḳhanjar hai kyā kiyā jaa.e

jo apnī zaat kī tārīkiyoñ meñ gum hai abhī

vo sub.h-e-nau kā payambar hai kyā kiyā jaa.e

kahāñ talak koī parkhe ki ab ba-sūrat-e-ḳhair

qadam qadam pe ajab shar hai kyā kiyā jaa.e

kahāñ kā jazba-e-hubb-e-vatan kahāñ kā ḳhulūs

bas eqtidār kā chakkar hai kyā kiyā jaa.e

qadam qadam pe hai ġhauġhā-e-bartarī kā junūñ

har ek ek se baḌh kar hai kyā kiyā jaa.e

jo gul-ba-dast the 'fāḳhir' kabhī hamāre liye

unhīñ ke haath meñ patthar hai kyā kiyā jaa.e

KHizan ki zad mein gul-e-tar hai kya kiya jae

yahi chaman ka muqaddar hai kya kiya jae

dil-o-nigah ko jis se sukun mayassar tha

lahu lahu wahi manzar hai kya kiya jae

buland-o-past ka har imtiyaz be-mani

ajib waqt ka tewar hai kya kiya jae

KHuda ka shukr hai jis haal mein guzar jae

ek intishaar to ghar ghar hai kya kiya jae

zaban se phul baraste hain guftugu aisi

aur aastinon mein KHanjar hai kya kiya jae

jo apni zat ki tarikiyon mein gum hai abhi

wo subh-e-nau ka payambar hai kya kiya jae

kahan talak koi parkhe ki ab ba-surat-e-KHair

qadam qadam pe ajab shar hai kya kiya jae

kahan ka jazba-e-hubb-e-watan kahan ka KHulus

bas eqtidar ka chakkar hai kya kiya jae

qadam qadam pe hai ghaugha-e-bartari ka junun

har ek ek se baDh kar hai kya kiya jae

jo gul-ba-dast the 'faKHir' kabhi hamare liye

unhin ke hath mein patthar hai kya kiya jae