KHizan ko kaif-e-bahaaran to ho gaya malum

ḳhizāñ ko kaif-e-bahārāñ to ho gayā ma.alūm

magar chaman pe jo guzrī hai us ko kyā ma.alūm

talāsh kartā huuñ muddat se apne aap ko maiñ

kahāñ pe TuuT gayā kho gayā ḳhudā ma.alūm

mujhe ye naaz ki harf-e-vafā pe qaa.em huuñ

unheñ ġhurūr ki ulfat kā mudda.ā ma.alūm

ḳhayāl-o-ḳhvāb kī duniyā meñ bhejne vaale

bhaTak rahā huuñ añdhere meñ tujh ko kyā ma.alūm

vo log vaqt ke dhāre badalte rahte haiñ

jinheñ ye vaqt kā andāz-o-silsila ma.alūm

vo ek shaḳhs jo kāñToñ pe raqs kartā thā

usī kā ḳhuun hai gulshan kī ibtidā ma.alūm

chalo ki aaj usī mah-jabīñ kī baat kareñ

jise vafā kā salīqa na hai vafā ma.alūm

udaas udaas se chehre bujhe bujhe se badan

ye kaisī bastī meñ maiñ aa gayā ḳhudā ma.alūm

kitāb-e-zīst meñ likkhā gayā hai surḳhī se

ġham-e-hayāt hai 'sādiq' kā azm-e-nā-ma.alūm

KHizan ko kaif-e-bahaaran to ho gaya malum

magar chaman pe jo guzri hai us ko kya malum

talash karta hun muddat se apne aap ko main

kahan pe TuT gaya kho gaya KHuda malum

mujhe ye naz ki harf-e-wafa pe qaem hun

unhen ghurur ki ulfat ka muddaa malum

KHayal-o-KHwab ki duniya mein bhejne wale

bhaTak raha hun andhere mein tujh ko kya malum

wo log waqt ke dhaare badalte rahte hain

jinhen ye waqt ka andaz-o-silsila malum

wo ek shaKHs jo kanTon pe raqs karta tha

usi ka KHun hai gulshan ki ibtida malum

chalo ki aaj usi mah-jabin ki baat karen

jise wafa ka saliqa na hai wafa malum

udas udas se chehre bujhe bujhe se badan

ye kaisi basti mein main aa gaya KHuda malum

kitab-e-zist mein likkha gaya hai surKHi se

gham-e-hayat hai 'sadiq' ka azm-e-na-malum