KHizan mile ki hamein mausam-e-bahaar mile

ḳhizāñ mile ki hameñ mausam-e-bahār mile

yahāñ vo dil hī nahīñ hai jise qarār mile

tamām umr ibādat kī nazr kar Dālūñ

bas ek baar tabī.at pe iḳhtiyār mile

hamīñ ko tark-e-talab raas aa ga.ī varna

tire karam ke ishāre to be-shumār mile

sadā rahe haiñ muqaddar ke iḳhtiyār meñ ham

kabhī hameñ bhī muqaddar pe iḳhtiyār mile

tamām log samajhte the tum na aaoge

tamām log magar mahv-e-intizār mile

rahe kisī kī nigāhoñ meñ ġhair hī 'ishrat'

ham ek baar mile yā hazār baar mile

KHizan mile ki hamein mausam-e-bahaar mile

yahan wo dil hi nahin hai jise qarar mile

tamam umr ibaadat ki nazr kar Dalun

bas ek bar tabiat pe iKHtiyar mile

hamin ko tark-e-talab ras aa gai warna

tere karam ke ishaare to be-shumar mile

sada rahe hain muqaddar ke iKHtiyar mein hum

kabhi hamein bhi muqaddar pe iKHtiyar mile

tamam log samajhte the tum na aaoge

tamam log magar mahw-e-intizar mile

rahe kisi ki nigahon mein ghair hi 'ishrat'

hum ek bar mile ya hazar bar mile